Akordeoi doinuak Madalena basilikan
Lasarte Oriako Zero Sette akordeoi Orkestrak emanaldia egingo du larunbatean Madalena basilikan. 20:00etan izango da kontzertua eta doan.
Lasarte Oriako Zero Sette akordeoi Orkestrak emanaldia egingo du larunbatean Madalena basilikan. 20:00etan izango da kontzertua eta doan. Kalitate handikoa da Zero Sette, eta sari ugari eskuratu ditu bere ibilbidean. Jose Manuel Crespo Cestafek zuzenduta Karl Jenkins, Francois Adrien Boieldieu, Jon Rixner, Tomas Aragues eta Gerhard Mohrren lanak eskainiko dituzte.
1987an sortu zuten orkestra. Jasotako sarien artean nabarmentzekoak dira Ourenseko akordeoiaren XXXV. Nazio Lehiaketa, Madrilgo Reina Sofia XVII. Nazioarteko Lehiaketa, eta Cedeirako (A Coruña) I. Akordeoi Lehiaketan lortutako lehen sariak. Kantabria Nazioarteko Akordeoi Lehiaketako Urrezko akordeoia ere eskuratu dute lasartearrek. Euskal Herrian barrena egindako kontzertuekin batera, Frantzia, Suitza, Italia, Alemania eta Polonian ere izan dira jotzen.
Errepertorio klasikoa oso landua du orkestrak eta azken aldian eskaintza berriak landu ditu. Besteak beste, arrakasta handia izan duten diaporamak antolatu ditu irudiak eta musika nahastuta istorioak sortuz, baita Jai Band kontzertuak eskaini ere.
