Indoor triatloia egingo dute otsailaren 1ean
Parte hartzaileek 500 metroko igeriketa proba egin beharko dute, 8 kilometro bizikleta estatikoan, eta 3,25 kilometroko lasterketa Fanderiako bidegorrian atonduko duten zirkuituan.
Iazko edizioan, bizikleta saioa bitartean. Errenteriako Indoor Triatloiaren ekinaldi berri bat egingo dute otsailaren 1ean, Fanderiako igerilekuetan BPXport SL eta Errenteriako Udalak antolatuta. Parte hartzaileek 500 metroko igeriketa proba egin beharko dute, 8 kilometro bizikleta estatikoan, eta 3,25 kilometroko lasterketa Fanderiako bidegorrian atonduko duten zirkuituan. Parte hartzaile bakoitzaren denbora guztia kalkulatzeko garaian hiru proben artean egindako trantsizio denborak ere kontuan hartuko dituzte.
Gizonen modalitatea, emakumeena, taldeena (gizon, emakume eta mistoak) eta familian hartu daiteke parte. Talde bakoitza hiru kirolarik osatuko dute eta proba hiru parte hartzaileen artean banatuko da, taldeko kide bakoitza diziplina bakar batean arituko baita.
Izena emateko epea zabalik dago, eta parte hartu ahal izateko Fanderiako kiroldegiko harrerara edo Galtzarabordako kiroldegiko harrerara jo dezakete interesdunek. Kuota 6 eurokoa da, eta ekipo modalitatean parte hartzen dutenek, berriz, 12 euro ordaindu beharko dituzte. Triatloia 15:30ean hasiko da.
Indoor Triatloia dela eta otsailaren 1ean Fanderiako igerilekua eta hidroterapia gunea itxita egongo dira 14:3oetik aurrera. Gainontzeko instalazioa zabalik izango da ohiko ordutegian. Udal kirol instalazioetako harpidedunak eta, oro har, nahi dutenek, Galtzarabordako Udal kiroldegiko instalazioak erabil ditzakete.
