Julen Lobete lezoarra, Realarekin
Atzoko Espainiako Kopako partidarako deialdian sartu zuten azken unean.
Julen Lobete. Argazkia: eldesmarque.com Julen Lobete Cienfuegos 19 urteko lezoarra lehen aldiz Realaren deialdian sartu zuen atzo Imanol Alguacil entrenatzaileak. Espainiako Kopako partida zuen Realak (2-0 irabazi zion Espanyol taldeari), eta jokatu ez zuen arren, Realeko lehen taldea egotea zer den badaki jada lezoarrak. Allerruko harrobiko taldeetan jokatutakoa da.
William Jose aurrelariak, azken unean, erabaki zuen ez jokatzea atzoko partida. Horrela, azkar batean sartu zuten Realaren lehen taldeko deialdian. Ez zuen jokatu, baina ziur gozatu egin zuela esperientziarekin.
Real Sociedad B taldeko jokalaria da Lobete. Bigarren B Mailako taldean 19 partida jokatu ditu, horietatik 17 titular bezala. Bost gol sartu ditu, eta taldearen erreferentzia da aurrealdean jokoan izan den 1.516 minutuetan. Urtarrilaren hasieran 2023ra arte luzatu zuen kontratua Realarekin: bigarren taldeko jokalarien artean, kontraturik luzeena duen jokalaria da.
