Pasaia Itsas Festibala, FITUR Nazioarteko Turismo Azokan
Euskal Autonomia Erkidegoak azokan duen postuan aurkeztu zuten atzo itsas ondarearen defentsa egin nahi duen jaialdia. Maiatzaren 28tik ekainaren 1era ospatuko da festibala.
EAEk FITURen duen postuan egin zuten itsas festibalaren aurkezpena. Euskal kostaldeko ekitaldi berritzaile gisa aurkeztu zuten atzo Pasaia Itsas Festibala, Madrilgo FITUR Nazioarteko Turismo Azokan. Azokari hasiera eman zioten egunean aurkeztu zen festibala, euskal erakundeek ematen dioten garrantziaren seinale. Euskal Autonomia Erkidegoari postu bat dagokio FITURen eta bertan egin zen aurkezpena.
Pasaiako Udalaren izenean, Izaskun Gomez alkateak hartu zuen parte. Harekin batera Rui Garcia Moitako alkatea izan zen. Moitak lankidetza akordioa itxi du Pasaiarekin eta gainera, Portugal bera da aurtengo itsas festibalaren ohorezko herrialde gonbidatua. Gainontzeko ordezkariak izan ziren; Xabier Agote Pasaia Itsas Festibalaren zuzendaria, Harkaitz Millan Basquetourreko zuzendaria eta Denis Itxaso Gipuzkoako Foru Aldundiko Kultura, Lankidetza eta Kirol diputatuak.
Promozioari dagokionez, gogor ari dira lanean erakunde eta eragile ezberdinak, Pasaia Itsas Festibalaren arrakasta, 2018koa baino handiagoa izan dadin. Hilaren 16an egindako aurkezpenean, antolatzaileek edizio berriaren ardatzen berri eman zuten. Festibala maiatzaren 28tik ekainaren 1era ospatuko da.
