Hondakinen bilketan zein Ikasle Gelan aldaketak, greba dela eta
Atez ateko bilketa egiten duten langileek greba egingo dutenez, ez dira hondakin organikoak jasoko. Ikasle Gela, itxita.
Asteazken gauean organikorik ez ateratzeko eskatu dute.
Datorren ostegunerako greba orokorra deitu du Euskal Herriko Eskubide Sozialen Karta osatzen duten eragileek. Horren harira, Oiartzungo Udalak ohar bat plazaratu du, eta iragarri du eskaintzen dituen hainbat zerbitzuetan eragina izango duela deialdiak.
Alde batetik, udal bibliotekarenean. Itxita egongo da, eta, ondorioz, Ikasle Gela ere bai. Bestetik, hondakinen bilketan ere nabarituko da greba. Atez ateko bilketako langileek erabaki dute grebarekin bat egitea, eta 29tik 30erako arratsean ez dute hondakinik jasoko.
Horregatik, Oiartzungo Udalak herritarrei eskatu die hondakin organikorik ez ateratzeko. Norbaitek larrialdirik izanez gero, Talaia industriaguneko Larrialdi Gunera eraman ditzake hondakin organikoak. Larrialdi gune hori 24 orduz irekita egon ohi da.
