Maria Mendizabal sopranoak bere herrian emanaldia eskainiko du
Mendizabalek Marta Barandiaran pianistarekin batera eskainiko du kontzertua, eta Susana Alonsoren bideoa proiektatuko dute.
Maria Mendizbal soprano oiartzuarrak 'etxean' kantatuko du. Maria Mendizabal soprano oiartzuarrak kontzertua emango du datorren larunbatean —otsailaren 1a—. Amodioaren mapa izeneko ikuskizuna eskainiko dute Mendizabalek eta Marta Barandiaran pianistak. Ekitaldia osatzeko Susana Alonso artista plastikoaren bideo proiekzioa izango dute lagun.
Mendizabalek Oarso Bidasoko Hitzari azaroan emandako elkarrizketan adierazi zuenez, maitasuna da abesti askoren gai nagusia, eta munduko hainbat amodiozko kanta hartu dituzte, Euskal Herritik hasita. “Erakutsi nahi dugu Euskal Herrian badagoela musika klasikoa, badagoela kantu eta pianorako musika, eta munduan dauden musiken maila bera duela”, adierazi zuen, emanaldiari buruz.
Lehenengo zatian euskal musikaren kutsua duten kantuak eskainiko dituzte. Esaterako, Jesus Guridi edo Aita Donostiarenak, baina baita Joseph Canteloubena auverniarrarenak ere. Bigarren zatian nazioarteko egileen abestiak eskainiko dizkiete kontzertura hurbiltzen direnei.
Musika klasikoko kontzertua dohainik izango da. Udaletxeko pleno aretoan izango da, 19:00etan hasita.
