Euskaraldian ARItzeko, lehen talde bulkada
Pasaiako hamahiru entitatek era aktiboan parte hartuko dute Euskaraldian. Herriko lehenak dira, ez, ordea, azkenak. Atzo aurkeztu zituzten.
Euskarldiarekin bat egin duten entitateetako ordezkariak, atzo. Euskaraldia forma hartzen ari da Pasaian. Azaroan Euskaraldia Saretzen jaiak egin zituzten lau barrutietan, aurtengo azaroaren 20tik abenduaren 4ra egingo den ariketa kolektiboa girotzeko lehen jarduera izan zen. Atzo, berriz, Blas de Lezo Itsas Arrantza Eskolan egindako ekitaldian, herriko hamahiru entitatek ‘bai’ esan zioten Euskaraldiari, eta aurkeztu egin zituzten. Arrate eta Lierni Hernandezek gidatu zuten saioa, umorez.
Ekitaldian adierazi zutenez, ahobizi eta belarriprest figurek garrantzia izango dute bigarren Euskaraldian. Baina Pello Jauregi Euskaraldiko pentsalariak adierazi zuenez, ariguneak (euskaraz aritzeko guneak) izango dira aurtengo berritasuna. “Hizkuntza ohiturak taldean aldatzeko aukera bezala ikusten ditugu ariguneak. Taldean bizi gara gure bizitzaren zati handi batean: lanean, kuadrillan, familian… Ariguneek taldean bizitzeko, beraz, hitz egiteko dugun ohiturari erantzungo diote, elkarren babesean, eroso, hizkuntza ohituretan eragiteko”. Hau da, kolektiboetan ere eragin nahi du 2020ko Euskaraldiak, horietan ahobizi eta belarriprest rolak egongo direlarik, kolektiboetatik eta entitateetatik norbanakoen hizkuntza ohiturak aldatu asmoz, euskararen erabilera bultzatzeko. Jauregiren mezu bat: “Maitasun handia diogu euskarari. Indar hori ekintza bihur dezagun”.
Loreto Osa Euskara zinegotziak, bere aldetik, Euskaraldian parte hartzera animatu zituen pasaitarrak.
Entitate eta kolektiboek Euskaraldian parte har dezaten epea zabalik dago, ariguneen bitartez.
Atzoko ekitaldian, hamahiru entitate horiekin grabatutako bideoak eman zituzten. Aldi berean, haietako batzuk euren konpromisoaren berri eman zuten zuzenean. Jarraian, entitate bakoitzak dagokion barrutiko panelean, eranskailua jarri zuen, Euskaraldiari ‘bai’ esateko. Honakoak dira entitate horiek:
- Xantixa Donibaneko gazte taldea.
- Itsas Mendi Kultur Kirol Elkartea.
- Ubera Liburutegiaren Lagunak.
- BPXport Udal Kirol Zerbitzuak.
- Santamaria arrandegia.
- Azti zentro teknologikoa.
- Trintxerpeko Korkoiburuak gazte taldea.
- Blas de Lezo Itsas Arrantza Eskola.
- Albaola Itsas Kultur Faktoria.
- Askalitz San Pedroko gazte taldea.
- Donimag argazki denda.
- Antxoko Topagunea.
- Antxo Areto Futbol Kirol Elkartea.
Azpialdean, atzoko ekitaldiko hainbat irudi
