Madrilen hiru egun pasatzeko asmoa dute Gazte Izanak-ekoek
Martxoaren 9tik 11rako bidaia antolatu du Oiartzungo jubilatuen elkarteak. Hiria bisitatuko dute, eta 'El rey León' ikusi.
Madrilgo panoramika. Gazte Izanak Oiartzungo jubilatuen elkarteko kideak bidaia antolatzen ari dira, martxoaren 9tik 11rako. Kasu horretan, Madrilera joango dira.
Martxoaren 9an, astelehenarekin, aterako dira Madrilera. Fuenlabradan hartuko dute ostatu, eta arratsaldean hiriko toki esanguratsuenetako batzuk bisitatuko dituzte. Biharamun arratsaldean, ekidinezina dirudien El rey león musikala ikusiko dute.
Azken egunean, berriz, Iberiar penintsulako udalerririk populatuena autobus panoramikotik ikusiko dute. Etxera bueltan, Segovian egingo dute geldialdia, bazkaltzeko.
Bidaiak 250 euroko prezioa izango du. Garraioa, otorduak, bisitak eta ikuskizuna barnebiltzen ditu prezio horrek.
Izena eman nahi dutenek astegunetan pasatu beharko dira Gazte Izanak-en egoitzatik. 10:00etatik 12:00etara egongo da irekita.
Ez da jubilatuen elkarteak begi bistan duen irteera bakarra izango. Astelehenean Abadiñora joango dira, sanblasetara.
