Udalak Luberrirekin eta Soinuenearekin dituen hitzarmenak, berrituta
Urteko lehen plenoa egin dute. Herriko bi museorekin dauden hitzarmenak berritzeaz gain, Urmendi eta Haurtzarori ekarpenak egin dizkiote.
Asteazken arratsean egin zuten urteko lehen udalbatzarra, eta bertan 11 puntu landu zituzten. Guztiak aho batez onartu zituzten.
Urte hasierako plenoetan joera izan ohi den bezala, gai nagusiak udalak hainbat erakunderekin dituen hitzarmenak berrikusi zituzten. Horrela, Luberri eta Soinuenean dituzten hitzarmenak luzatu zituzten.
Luberriri 62.737 euro emango dio udalak eta Pagoaldea industriaguneko lokala uzten jarraituko du datozen lau urteetan. Soinuenearen kasuan, hitzarmenak iraupen berbera izango du, eta 93.300 euro jasoko dituzte aurten. Lau lokal utziko dizkiete: Ergoiengo eskola zaharra, eta beste hiru, biltegi bezala.
Hezkuntzarekin lotutako beste bi puntu ere aztertu zituzten. Udal Ikastola Partzuergoari hilero 50.000 euro bideratuko dizkiote —ekainean eta abenduan, 100.000—. Haurtzaro Ikastolari, berriz, hilero 34.602 euroko ekarpena egingo diote.
Bestalde, Lintzirin industriaguneko zerbitzu bide berria izan zuten hizpide. Zehazki, eraiki egin ondorengo lur soberakinak hango enpresei alokairuan utziko zaie.
Zerrenda kanpoan zegoen gai bat sartu zuten. Redesak auzi administratiboa ireki zion Oiartzungo Udalari, energia elektriko, ura eta gasaren sareari ezarri zion tasagatik. Araba, Bizkaia eta Gipuzkoako Auzitegi Nagusiak arrazoia eman zion Redesari. Udalaren zerbitzu juridikoek, baina, aurrera egiteko argudioak ikusi dituzte, eta kasazio helegitea jarriko du, aho batez erabakita.
Liburutegiaren kolorea
Galdera eta eskaeren tartean, EAJk Manuel Lekuona bibliotekaren itxura aldaketari buruzko galdera egin zuen. Janire Mitxelena zinegotziak urdinez margotzearen zergatia galdetu zuen, eta ea herriko eragileekin adostua zegoen.
Agustin Lekuona Hirigintza zinegotziak erantzun zion udal arkitektoak eta Hirigintzako zinegotziak aztertutako gaia izan dela. Adostu zuten aldaketa erradikal bat behar zuela, eta udal eraikinak nabarmendu behar direla.
