MIN Saria irabazteko laguntza eskatu du Sergio Zurutuzak
Musika Independentearen Sarietara aurkeztu da berriz ere musikari pasaitarra. Irabazleak, internet bidezko prozesu parte hartzaile baten bitartez erabakiko dira.
Sergio Zurutuza 'Rareza/Rarity aurkeztu du MIN Sarietara. Sergio Zurutuzak laguntza eskatu die haren musika gustuko duten herritarrei. Aurten ere, MIN, Musika Independentearen Sarietara aurkeztu ditu bere lanak, eta jendearen hitza funtsezkoa izango da irabazleen artean egoteko. Prozesu parte hartzailea da MIN sariena, jendearen bozek aukeratzen dituzte onenak. Klik gutxi batzuk asko lagundu ahal diote musikari sanpedrotarrari.
Martxoan publikatutako Rareza/Rarity diska da Zurutuzak aurkeztu duena. Boza internet bidez eman beharko da, honako webgunean. Zurutuzak berak sare sozialetan azaldu duenez, bozkatzeko prozesua oso sinplea da. Lehenik eta behin, MIN Sarien webgunean kontu bat sortu behar da. Jarraian erabiltzaileek baieztapen mezu elektroniko bat jasoko dute eta bertan ageri den esteka sakatu beharko dute. Bukatzeko, nahikoa da Sergio Zurutuzaren izena idaztea bilatzailean eta bere alde bozkatzea. Guztira lau sailetan aurkeztu da Zurutuza: artista onena, munduko musiken eta fusio album onena, abesti onena eta produkzio onena.
Zurutuzak berak martxoan iragarri zuenez, Rareza/Rarity-n 2017. urtean geroztik konposatu dituen lan guztiak bildu ditu. Nagusiki lan instrumental bat da, eta denaren gainetik dibertsitatearen aldarria.
