Motzian Motz film laburren lehiaketa, Piztu Lezoren eskutik
Motzian Motz Film Laburren Lehiaketarako lanak martxoaren 7ra arte aurkez daitezke. Martxoaren 15ean sari banaketa gala egingo dute.
Martxoaren 7ra arte aurkez daitezke lanak. Piztu Lezo dinamikak proposamen berri bat egin die lezoarrei: film laburrak egin, eta lehiaketa batean parte har dezaten bidaltzea. Motzian Motz II. Film Laburren Lehiaketa abian dute.
Hiru baldintza bete behar dituzte aurkeztuko diren lanek: batetik, hitzartu duten gaia kontuan hartzea: Gazta da gaia; bestetik, lanek ez dezatela bost minutu baino gehiago iraun; eta azkenik, lan horiek martxoaren 7a baino lehenago entregatu behar direla.
Izena ematea eta parte hartzea biak bat dira. Hau da, posta elektroniko batera bidali behar dira lanak, eta horrekin izen ematea eta parte hartzea bermatua dago.
Lehiaketa izanik, noski, badago saria: lan irabazlearen egileak edo egileek lau pertsonarentzako afaria irabaziko dute Oriotarra jatetxean.
Aurkeztutako lanekin, gala handia egingo dute martxoaren 15ean. Sariak emango dituzte bertan.
