Segurtasuna bermatzeko lankidetza estuagoa hitzartu dute Pasaiak eta Donostiak
Azken asteetan Antxon gertatuko lapurretek eragindako haserrearen ondorioz, partekatutako zonaldeetan neurriak hartzeko aukerak aztertu dituzte Pasaia eta Donostiako alkateek.
Herritarren haserreak, agintariak neurriak hartzera behartu ditu. Pasai Antxoko herritar askok nahikoa izan dute eta kalera ateratzeaz gain, herriak pairatzen duen utzikeria sistematikoa salatzeko antolatzen hasiak dira. Antxotarren haserrea gora egiten ari den honetan, partekatutako zonaldeetan zaintza lanak indartzea erabaki dute Pasaia eta Donostiako Udalek.
Segurtasuna bermatzeko eta delituak saihesteko plana aurkeztu zuen urtarrilaren 31an Pasaiako Udalak. Iragarritako neurrien artean, Donostiako alkatearekin bilkura bat egitekoa zela zioen planak “kontutan izan behar da hainbat lapurreta Eskalantegi kaleko donostiar aldean gertatu zirela, ez Pasaian” azaldu dio HITZAri Izaskun Gomez Pasaiako alkateak. Bada, astelehenean batzartu ziren Izaskun Gomez eta Eneko Goia, Donostiako alkatea Pasaian sortutako segurtasun planaren nondik norakoak aztertzeko.
“Giro adeitsuan” burututako bileran, partekatutako zonaldeetan lankidetza estuagoa izateko konpromisoa lortu zuen Gomezek Goiaren aldetik. “Donostiako Udaltzain gehiago egoteko eskatu diot baita Eskalantegi kalean edo Darieta bidean argiztapena hobetzea ere”, adierazi du Pasaiako alkateak. Mugakide diren bi udalerriren artean elkarlana bermatuta egon behar duela diote, ez soilik Antxon, baizik eta Trintxerpeko Azkuene kalean ere.
Iragarritako lankidetza estutzen aldera, bi udalek bilera gehiago antolatuko dituztela azaldu du Gomezek, “bi udalerrietako Udaltzainen buruak eta segurtasun zinegotziak hilaren 11n batzartuko dira, neurriak koordinatzen hasteko”. Argiztapenari dagokionez, Marisol Garmendia, Donostiako Udalaren zerbitzuen arduradunak, Antxoko barrutia bisitatuko du, argiztatu beharreko gune ilunak lehen eskutik ezagutzeko. Planak talde hiritarren ekarpenak jaso ditzan, helbide elektronikoa sortu du Pasaiako Udalak.
