Euskal Herria plazako zuhaitzen kimaketa "diru xahuketa" da Lezoko EH Bildurentzat
13.000 euroko kostua dute kimatze lanek. Lorezaintzaz arduratzen den enpresak eta Ingurumen teknikariak ez dute beharrezko ikusten kimaketa.
Euskal Herria plaza, Lezon, artxiboko irudian. Lezoko udal gobernu taldearen asmoa da Euskal Herria plazako zuhaitzak kimatzea. 30 urte inguruko 22 platanondo dira. Horiek kimatzeko 13.000 euroko aurrekontua adostu du gobernu taldeak, eta EH Bildu ez dago ados: “Gobernu taldeak 13.000 euro xahutu nahi ditu arriskurik sortzen ez duten eta beharrik ez duten zuhaitzak kimatzeko”.
Lezoko EH Bilduk baieztapen hori indartzeko Lezoko lorezaintza lanen ardura duen enpresako teknikarien txostenari eta Ingurumen teknikariaren txostenari egin die erreferentzia.
Lorezaintza enpresaren arabera, kimaketa egiten bada, zuhaitzen egitura naturala aldatu egingo da, “egoera naturalean hazi diren zuhaitzak dira, inongo kopa jaitsierarik jaso gabe. Hau dela-eta zuhaitzen egitura naturala mantendu egin da, eta honek adarrak hausteko arriskua gutxitu egiten du”. Hala, lorezaintza enpresaren proposamena da kimaketarik ez egitea, “segurtasun maila handiagoa bermatua egongo delako. Gainera, kimaketa lanak egiten badira, zuhaitzak maiztasun batekin kimatu beharko dira”.
Lezoko Udaleko Ingurumen teknikariaren iritzia ere helarazi du oharrean EH Bilduk. Bertan jasota dago kimatzeak ez duela segurtasuna hobetuko, “eta lorezaintza zerbitzuarentzako gainkostua suposatuko du, urtero mantenu lanak egin beharko baitira”. Eragin paisajistikoaz ere mintzo da Ingurumen arduraduna, “eragin paisajistiko handia edukiko du, eremua guztiz itxuraldatuz. Horretaz gain, Gipuzkoako Foru Aldundiko Bide Azpiegituretako zerbitzutik adierazi dute ez dutela errepidearentzat arriskurik suposatzen”. Hartara, Ingurumen teknikariaren ondorioa da kimaketa lanen gastua ez dagoela justifikatua.
Horiek horrela, EH Bilduk gobernu taldeari (EAJk eta PSE-EEk osatzen dute) eskatu dio atzera egin dezala asmoan, “ez dago inolako arrazoirik horiek kimatzeko: ez segurtasun arrazoirik, ez eta bestelakorik ere”. 13.000 euro horiek “herriko beste beharrak asetzeko” erabil daitezela eskatu du koalizioak, adibidez, “Jaizkibelen bertako zuhaitzak eta landareria berreskuratzeko”.
