Dena prest bertso tailerraren bigarren saioari ekiteko
Hilaren 14rako (ostirala) deitu dute Pasaiako bertso tailerraren bigarren saioa. San Pedron egingo da eta LH 4 eta DBH 1 bitarteko ikasleek parte hartu ahalko dute.
Bertso tailerra bigarren aldiz antolatuko da otsailean.
Urtarrilean lehen aldiz antolatutako bertso tailerrak, jarraipena izango du otsailean. Pasaiako Udalak jakitera eman du bertso tailerraren bigarren saioan hilaren 14an (ostirala) egingo dela. 18:30etatik 19:30etara egingo da, San Pedroko liburutegian. Tailerra, LH 4 eta DBH 1 bitarteko ikasleei zuzenduta dago. Metodologia ludikoa izango da eta norberaren mailaren baitan, edonork parte hartu ahalko du. Bigarren tailer hau ere, Eider Perez bertsolari eta aurkezle trintxerpetarrak gidatuko du.
Bertso-tailerrak hiru helburu beteko dituela jakinarazi dute antolatzaileek: Garai bateko zein gaur egungo bertso eta bertsolarien errepasoa eginez, bertsolaritzaren testuinguru historikoa ezagutuko dute. Kantu eta jolasen bidez bertsoaren oinarrizko edukiak aurkeztuko dituzte, hau da, errimak, doinuak eta neurriak. Gainera, taldean edo nor bere kabuz idatzizko kopla bat sortzeko baliabideak landuko dira, hori baita zaletasuna pizteko eta trebatzeko modurik onena.
