Agrupacion Coral Tafallesak, kontzertua emango du basilikan
Kulturaren eta zehazki, musikaren sustapena egiten jarraitzen du Maria Magdalenaren Lagunak Kultur Elkarteak. Egitarau oparoa antolatu du urtero bezala aurtengorako ere, eta hilabete honetan Nafarroara jo du.
Agrupacion coral tafallesa arituko da larunbatean basilikan.
Kulturaren eta zehazki, musikaren sustapena egiten jarraitzen du Maria Magdalenaren Lagunak Kultur Elkarteak. Egitarau oparoa antolatu du urtero bezala aurtengorako ere, eta hilabete honetan Nafarroara jo du. Bertatik dator emanaldia egingo duen Agrupacion Coral Tafallesa abesbatza eta larunbatean 20:00etan hasiko da emanaldia; orain artekoak bezalaxe, doakoa izango da kontzertua.
Tafallako abesbatzak kontzertu paregabea eskainiko duen zalantzarik ez dute antolatzaileek eta jotaren bat abestuko dutela ere aurreratu dute. Halaber, emanaldiak izango duen musika balioaz harago jo dute antolatzaileek; izan ere, lotura handia sortu zela bi herrien artean nabarmendu dute Maria Madalenaren Lagunak Kultur elkarteko kideek: “Basilikaren presbiterioaren erdialdean dagoen Maria Madalenaren irudi txikia Tafallatik ekarri zuten 1947. urtean. Aste Santuan paso gisa erabiltzeko dohaintzan eman zion Tafallako Santa Maria elizari bertako familia batek; irudi hori ordea, polikromatutako taila, ez da egokia prozesioan ateratzeko, eta Errenteriara ekartzeko aukera eskaini zuten, nahikoa merke erosita”.
Antolatzaileek, herritar guztiak animatu dituzte kontzertuan parte hartzera. Emanaldia Madalena Basilikan izango da.
