Batelen ligan, bi garaipen gehiago San Juanentzat
Gipuzkoako Batelen Ligako laugarren estropada egin zen atzo Trintxerpe-Illunbek antolatua. Arrosak, Oarsoaldekoen artean garaipena lortutako bakarrak.
Illunbeko batel bat atzo lehian. Argazkia: Josu Z. Gipuzkoako Batelen Ligako laugarren jardunaldia jokoan izan zen atzo (igandea) Trintxerpe-Illunbek antolatua, Pasaiako badiako bokalean. Bertan, Oarsoaldeko batelen artean (Bidasoko arraun elkarteek ez dute ontzirik aurkezten) garaipen bakarrak San Juanek lortu zituen, zehazki, nesken Promesa Mailan, eta mutilen Gazte Mailan.
Beste kategorietan, nesken Haur Mailan Tolosaldea izan zen irabazle, eta San Juan hirugarren. Hibaikako A eta B batelak seigarren eta zazpigarren izan ziren hurrenez hurren.
Mutilen Haur Mailan, berriz, Zumaia irabazlearen atzetik sailkatu zen San Juan. Illunbe laugarren izan zen.
Nesken promesetan, arrosak irabazle, eta Hibaikako ontzia laugarren. Mutilen kadeteetan, berriz, Zumaia azkarrena izan zen, San Juan A laugarrena, San Juan C bederatzigarrena, eta Hibaika A hamargarrena. Beherago sailkatu ziren San Juan B (13), Illunbe (15) eta Hibaika B (17).
Nesken Gazte Mailan Tolosaldea lehenengo eta Orio B bigarren. Hirugarrena izan zen San Juan. Mutiletan, gazteetan ere bai, San Juan lehena, Yola A hirugarrena, eta Illunbe A seigarrena. Atzerago Oarsoaldeko ordezkari hauek: Hibaika (11), Illunbe B (12) eta Yola B (15).
Nesken absolutuan Donostiarra A izan zen azkarrena, San Juani 28 segundoko aldea atera zioten. Hibaikak laugarren postua lortu zuen, eta Illunbe zazpigarrena izan zen.
Mutilen seniorretan, Donostiarra, Orio eta Zaurautzen atzetik Illunbe laugarrena izan zen, eta San Juan seigarrena.
Hurrengo estropada, Gipuzkoako Ligako seigarrena, Zumaian izango da, hilaren 16ko goizean.
Jarraian, atzoko emaitzen berri, eta ligako sailkapen nagusiaren berri, PDF artxibo banatan.
– Gipuzkoako Batelen Ligako laugarren jardunaldia Trintxerpen.
– Gipuzkoako Batelen Ligako sailkapen nagusiak (2020-02-09).
