2019: indarkeria matxista salaketa gehiago, eta lapurreta gutxiago Oarsoaldean
Indarkeria matxista kasuen salaketen kopuruak gora egin zuen 2019an Errenteriako Ertzain Etxean. Lapurretak 1.400 izan ziren, gehienak kalekoak.
Ostiraleko batzarraren irudia. Hilaren 7an egin zuten Errenteriako Ertzain Etxean Oarsoaldeko herrietako Udaltzaingoen eta Ertzaintzaren arteko Koordinazio Batzordearen batzarra. Pasaiako, Errenteriako eta Lezoko udal ordezkariak ere izan ziren bertan, azken bi herri horien kasuan alkateak.
Errenteriako Ertzain Etxean jasotako salaketen berri eman zuten bilkuran, besteak beste. Horien arabera, indarkeria matxistarekin eta askatasun sexualarekin lotutako salaketak 218 izan ziren iaz, 2018ko 197en aldean. Lapurreten kasuan, 1.400 izan ziren iaz eta 1.447 2018an; iazko datuetan 73 (78 2018an) izan ziren etxeetan egindako lapurreten salaketak, eta 20 enpresetakoak (39 2018an). Bestalde, lesioekin harremana izan zuten delituen kopurua 217koa izan ziren 2019an, 2018ko 255en aldean.
Datu horiek guztiak kontuan hartuz, 2019an %1,01ean jaitsi egin zen, betiere Errenteriako Ertzain Etxean jarritako salaketetan oinarrituta, arau hauste penalen zenbatekoa: 2018an 2.279 izan ziren denera, iaz 2.256. Ertzaintzak emandako datuen arabera, 1.000 biztanleko delituen tasa %31,32koa izan zen iaz Oarsoaldean. Tasa hori %33,74koa da Gipuzkoan, eta %41,86koa EAEn.
Datu horien guztien analisia egin zuten ostiraleko bilkuran. Horrez gain, eta beste hainbat gairen artean, tokian tokiko Udaltzaingoek eta Ertzaintzak hainbat prebentzio neurri aztertu zituzten, erakundeekin elkarlanean egin beharrekoak.
