'Herri bat, Gaztetxe bat' mugimendua sortuko dute Donibanen
Herritar guztiek bat egin ahalko dute iniziatibarekin. Helburu nagusien artean, Birgiña gunearen garbiketa eta eraberritzea izango dute.
Gazteen topaleku berria izateko eraberritzen ari dira Birgiña. Irudia: Xantixa. Azken hilabeteetan Pasai Donibaneko gazteek hausnarketa prozesua abiatu dute, gaztediaren aisialdi eredua zein izan behar duen zehazteko, baita herriarekiko duten konpromisoa bermatzeko ere. Prozesu horren ondorio da adibidez, gazte talde batek sortutako Xantixa Kultur Elkartea. Gazteek oinarrizko bi helburu antzeman dituzte; gazteentzako gune aske bat lortzea eta herria biziberritzea. Bada, bi helburuak gauzatzeko leku aproposa topatu dute Birgiñan.
Birgiñako zonaldea, luzaz utzita izan dela salatzen dute gazteek eta inguruak dituen premiak ikusita, garbitzeko erabakia hartu dute. Joana den urtarrilaren 26an gunea txukuntzen aritu ziren Donibane eta Lezoko hainbat biztanle, Xantixa Kultur Elkartearen laguntzarekin. Garbiketa ekintza xume baten atzean ordea, Birgiña modu herrikoian eraberritzeko asmoa dago.
Birgiñan hartutako eskarmentuak, herri mugimendu bat sortzera bultzatu ditu, ‘Herri bat, Gaztetxe bat’ lelopean. Lehen helburua, gazte taldeentzako gune aske bat lortzea izango da, baina askoz ere gehiago eskaini nahi diote herritarrei. Aurki, Birgiña garbitzeko saio gehiagoren berri emango dute. Hilaren 15ean (larunbata) bestalde, kulturarekiko duten harremana bermatuko dute Birgiñan bertan; haur eta gurasoentzako eskulan tailerra antolatuko dute 16:30etatik 19:00etara. Jarraian hitzaldia izango da, ‘Herriak bakarrik salba dezake herria” izenburupean.
Bi aste ondoren, hilaren 29an (larunbata) Jardunaldi Urbano Alternatiboa ospatuko dute, berriz ere, Birgiñan. 16:30etatik 17:00etara, muralak margotzeko aukera izango da. 18:30etatik 20:00etara errimen tartea izango da, oilar rap borrokak egingo baitituzte. Eta eguna amaitzeko, beste hitzaldi bat; ‘Herri bat, Gaztetxe bat’ 20:00etan.
