Euskal Herriko azken zurezko ontzigileak erretiroa hartuko du
Bere ibilbide profesional osoa ontzigintzan eman du Esteban Gozategik, azken urteak, Albaolan. Hilaren 28an hartuko du erretiroa.
Euskal Herriko azken zurezko ontzigiletzat jo dute Esteban Gozategi. Bere ibilbideari amaiera emango dio Euskal Herriko azken zurezko ontzigileak. Hilaren 28an hartuko du erretiroa Esteban Gozategik (Orio, 1954). Pasioa baino ez du erakutsi gizonak ontziekiko bizitza osoa eman baitu haiengandik gertu. 12 urte zituela hasi zen lanean Agustin, bere aitaren laguntzaile gisa Orioko Mutiozabal ontziolan. 16 urte bete arte Oriaren ibarrean jardun zuen lanbidea ikasten.
Aurrerago mekanika ikasteari ekin zion, ordurako baxurako ontzien eskariak nabarmen mugatu ziren eta. Soldaduskatik bueltan baina, aitarekin lan egitera itzuli zenerako ontzigintza tradizionalaren egoera kaxkarra zela oroitarazi du Gozategik, “momentu honetan jada lana konponketak egitera mugatzen zen. Ontziolaren azken aroan, beste ontziola batzuentzat lanean eta mantentze lanetan aritzen nintzen batez ere. Zaila”. Zura ontzigintzan erabili zen azken urteak ezagutu zituen Gozategik.
Belaunaldi berriek asko ikasi ahal izan dute Gozategirekin.
2011n, 57 urte zituela, aro berri bati ekin zion eta era berean jatorrira itzuli zen, Albaolak kontratatu baitzuen, “ezin nuen sinetsi. Aukera paregabea zen gustuko nuen hori egiten jarraitzeko. XVI. mendeko ontzi bat eraikitzea gainera nire ibilbideari amaiera emateko modu polita da. Aitarekin ikasitakoa Albaolako lankideekin partekatu ahal izan dut”, azaldu du ontzigileak.
Ia 10 urte pasa ditu Esteban Gozategik Albaola Itsas Kultur Faktorian, belaunaldi berriei dakien guztia irakasten. Horrez gain, San Juan Baleontziaren eraikuntza prozesuan, parte hartze garrantzitsua izan duela nabarmendu dute faktoriatik. Azken txanpan zela, aukera bat eman zioten Euskal Herriko azken zurezko ontzigileari eta ezin hobe baliatu zuen. Hutsune handia utziko du Gozategik, Albaolan zein ontzigintza tradizionalean.
