Urumea ibaiko aprobetxamendu eskubidearen iraungitzeko erabakiari ez dio helegiterik jarri udalak
Eguzki talde ekologistak txalotu egin du erabaki hori, baita udala zoriondu ere, "ibaiaren konektibitate ekologiko hobea ahalbidetzeko eta Natura 2000 sareko kokagune honetan izokina berreskuratzeko apustua egin duelako".
Kantauriko Konfederazio Hidrografikoak ekoizpen elektrikorako Ereñozuko Urumea ibaiko uren 4.000 litro segundoko aprobetxamendu eskubidea iraungitzea erabaki zuen joan den hilabetean. Errenteriako Udalaren jabetzakoa da aprobetxamendu eskubide hori, eta behin iraungita, hamar hilabeteko epea eman dio Ereñozuko presa eta arrainen eskala eraisteko proiektua aurkeztu dezan. Erabakiaren aurrean ez du helegiterik aurkeztu udalak eta Eguzki talde ekologista eta antinuklearrak txalotu egin du jarrera hori. Udalera jo zuela taldeak azaldu dute, “ingurumenaren aldeko jarrera aktiboa har zezala eskatu genion, eta ez zela erabili Urumea ibaian zuen emakida iraungitzeko kontsortzioak hartutako erabakiaren aurkako errekurtsoa aurkezteko zuen aukera”.
Udalak ebazpenaren aurka ez joateko erabakiaren berri eman dio orain Eguzkiri, eta talde ekologistak txalotu egin du erabaki hori, baita udala zoriondu ere, “ibaiaren konektibitate ekologiko hobea ahalbidetzeko eta Natura 2000 sareko kokagune honetan izokina berreskuratzeko apustua egin duelako”.
