[Bideoa eta galeria] Pozik dago Trapujale lezoarren artean
Trapujale Lezora iritsi da, inauteriak Lezon gozatu nahi dituelako. Ez da bakarrik iritsi, ordea. Mari Nazkane eta zirikuak ez ditu urrun izan, ziur.
Trapujale, gaur, Gurutze Santuaren plazan. Hasi dira Lezoko inauteriak. Herrian da Trapujale. Jaizkibeldik jaitsi da, Martizkone baserritik. Donostiako Alde Zaharreko joaldunen laguntza izan du herrira jaisteko, baita Tomas Garbizu Musika Eskolako ikasle trebeena ere. Pozik dago, biziki maite duelako lezoarrekin batera inauteri giroan murgiltzea. Ez daude hain pozik Mari Nazkane eta zazpi zirikuak, ziur Trapujaleren kontrako zerbait asmatuko dutela egunotan. Hor nonbait egongo ziren Trapujale herrira jaitsi bitartean, planak egiten.
Harrera bikaina izan du inauterietako pertsonaiak. Lezoarrek ongi jaso dute, jakin arren, aurreko urteetan bezala, sutan buka dezakeela. Baina gaurko egunean behintzat, arazorik ez. Hasi da mozorroen festa bete egin den Gurutze Santuaren plazan.
Aldi berean, gaurko hasiera ekitaldian, Trapujale Taldea omentzeko parada izan da. Haien izenean Mikel Susperregik eta Lander Zurutuzak jaso dute merezitako oroigarria udaletxe atarian Jesus Mari Mariarena alkatearen eta Ion Ponbar Kultura zinegotziaren eskutik. Haiek, pozik, eskertu egin dute aitortza, eta lezoarrei inauteri zoriontsuak opa izan dizkiete. Lezoarrak, pozarren. Jarrai dezala mozorroen festak!
Gaurtik aurrera asko dago gozatzeko. Hemen biharko eta etziko egitarauak:
Bihar (Ostiralori)
- 09:30. Lezo Herri Eskolako eta Lezo Institutuko ikasleen kalejira herritik.
- 10:30. Lezo Herriko Eskolako eta Lezo Institutuko ikasleen Garraioak ikuskizuna Bekoerrota kiroldegian.
- 11:00. Pasaia-Lezo Lizeoko ikasleen eskutik, Trapujale festa Gurutze Santuaren plazan. (eguraldi txarrarekin Karlos Saldisen egingo dute).
- 17:30. Murixka Dantza Taldearen lokaletik abiatuta, Sorgin Dantza eta Zirikuen kalejira.
- 19:00. Lezoko Euskal Dantzazaleen eskutik desfilea Bekoerrota kiroldegitik hasita.
- 19:00. Lezoko Euskal Dantzazaleek XVI. mendeko sorgin dantza ikuskizuna emango dute Gurutze Santuaren plazan.
- 20:00. Kartelada.
Etzi (Larunbatgorri)
- 12:30. Piztu Lezoren Lezoarock jaialdiaren hasiera, kuadrillen arteko karro-poteoarekin.
- 14:00. Lezoarock jaialdiaren antzerki-ekitaldia plazan.
- 15:00. Inauterietako herri bazkaria Koldobide Gezala pilotalekuan. Jarraian, karaokea.
- 17:00. Lopenetik, Peru musikariarekin kalejira. Ondoren, txokolate jatea eta festa Gurutze Santuaren plazan (eguraldi txarrarekin Karlos Saldisen).
- 17:00. Lezoarock jaialdiaren barruko arratsaldeko desfilea.
- 20:45ean, Piztu Lezokoek zizka-mizkak eta pintxoak emango dituzte Txerrimuñon.
- 21:00. Txerrimuñon, Andoni Oilokiegiren emanaldia.
Segidan dagoena, Trapujaleren Dantzaren zati bat, bideoan. Beherago, etorreraren hainbat irudi.
