Ukrainera jorratuko dute Hizkuntzen Topagunean
Zikloa hasteko hitzaldiak egingo dituzte ostegun arratsaldean. Ukraineraren grafia izango dute hizpide, baita Jose Maria Iparragirre eta Taras Xevtxenko ere.
Aurreko zikloan amazigha landu zuten.
Udalak, Hizkuntzen Topagunearen bitartez, Errenteria-Oreretako aniztasuna aintzatetsi nahi du.
Lehenengo zikloan amazigh kultura eta hizkuntzaren berri izan zuten, eta bigarrenean ukrainera izango da. Hizkuntza horretara hurbilduko dira datorren ostegunean, hilak 27, egingo duten hitzaldian. Xenpelar Etxean izango da, 18:30ean hasita.
Bi hizlarik hartuko dute hitza. Alde batetik, Natalia Mykhaylevskak, ukrainera eta haren grafiari buruzko azalpenak emateko. Bestetik, Jose Andres Alvaro Ocarizek, Jose Mari Iparragirre eta Taras Xevtxenko: bi herri eta amets bera: askatasuna.
Mykhaylevska Ukrania-Euskadi elkarteko kidea da, eta bi komunitateen arteko loturak indartzeko lanean dihardu. Alvaro Ocariz, berriz, irakaslea da, eta hainbat dibulgazio lan egin ditu.
Informazio gehiago nahi izanez gero, Udal Hizkuntza Politika Sailarekin jarri behar da harremanetan.
