San Markos Mountain Bike Lasterketa, igandean
Errenteria-Oreretak Euskadiko Openeko lehen proba eta Gipuzkoako Txapelketa beregain hartuko ditu igandean San Marko gotorlekuan
San Markos BTT lasterketaren aurkezpena Oarsoaldeko Txirrindularitza Elkarteak (OTXE) antolatua, beste urte batez gainean da San Markos Mountain Bike lasterketa. Martxoaren 1ean, igandea, izango da proba. Txirrindularitza lasterketa hau Euskadiko Openeko zirkuituaren barruan dago sartua, eta aurtengo ekitaldian, Euskadiko Openeko lehen lasterketa izateaz gain, Gipuzkoako Txapelketa ere izango da. Goi mailako BTT txirrindularitza, beraz, San Markon.
Maite Gartzia, Errenteriako Udaleko Kirol zinegotzia; eta OTXEko kide diren Urko Munduate eta Uxue Polo txirrindulari gaztea izan dira Merkatuzarren lasterketaren aurkezpenean.
Txirrindulariek 5,8 kilometroko zirkuituaren barruan egingo dituzte lehiak, eta kategoriaren baitan, itzuli kopuru ezberdina egingo dute parte hartzaileek. San Markoko gotorlekutik abiatuta, goizeko 11:00etan ekingo diote kategoria federatuek lasterketari, hau da, kadete, junior, master, 23 urtez azpiko eta elite mailako txirrindulariek. Kategoria federatu horiek dira Euskadiko Openean eta Gipuzkoako Txapelketan parte hartuko dutenak. Amaiera ere San Markoko gotorlekuan bertan izango da.
Horrez gain, txirrindulari federatuen proba aprobetxatuz, bigarren urtez eskolarteko kimu eta infantilen lasterketa ere ospatuko da igandean, Euskadiko Openetik eta Gipuzkoako Txapelketatik at. 10:00etan hasita, gaztetxoek ibilbide motzago bati egin beharko diote aurre, 1,5 kilometroko zirkuitu bati, eta kategoriaren baitan ere itzuli kopuru ezberdina gauzatuko dute txirrindulariek.
Antolatzaileek parte hartze handia espero dute, eta jada 150 txirrindularik egin dute aurretiko izen-ematea igandeko probarako. Udalaren izenean, Maite Gartzia kirol zinegotziak eskerrak eman dizkio OTXEri txirrindularitza arloan egiten duten lanarengatik, eta herritarrak animatu ditu parte hartzera eta San Markora gerturatzea lasterketa ikusteko eta girotzeko.
Izen-emateak Euskadiko Txirrindularitza Federazioaren web orrian egin behar dira.
