Garbizuren 'Kontzertu Magikoa'-rekin hasiko da XXXIV. Lesoinu
Helburu pedagogikoa izango du, ohi bezala, iniziatiba musikalak. Adin guztientzako ekitaldiak egongo dira, datorren astetik hasita.
Val, Pombar, Martiarena eta Espina, Lesoinu 2020 ekitaldiaren aurkezpenean.
Datorren ostegunean —martxoak 5— hasiko da Lesoinu Lezoko Aste Pedagogikoaren 34. ekitaldia. Gaur aurkeztu dute Jesus Maria Martiarena alkateak, Jon Pombar Kultura zinegotziak, Xanti Espina Tomas Garbizu Musika Eskolako zuzendariak eta Xanti Val Kultura zinegotziak eman dituzte xehetasunak.
Udal gobernu taldeko kideek gonbidapena luzatu diete herritarrei, ekitaldietan parte har dezaten. Pombarrek azaldu du Lezok beti izan duela lotura musikarekin, eta Tomas Garbizu edo Polentzi Gezala bezalako musikari handiak eman dituela. “Urrutira joan gabe”, jarraitu du Pombarrek, “gaur egungo lezoar gazteek —eta ez hain gazteek— badute trebetasuna musikarekin”.
Gaineratu du harro egoteko modukoa Lesoinu bezalako ekitaldi bat egitea eta hainbeste urtez irautea.
Apirilaren 6ra arte
Xanti Espina musika eskolako zuzendariak egitarauari buruzko xehetasunak eman ditu. Gogorarazi du aspaldi ez zutela Garbizuren zerbait lantzen, eta Jon Makusok egindako lanak horretarako aukera emango du. Josu Okiñena —pianoan— eta Ales Da Costa —biolinarekin— izango dira Kontzertu Magikoa (eta beste hainbat pieza interpretatuko dituztenak).
Biharamunean, beste ekitaldi berezi bat egingo dute: Rock Classical Trio. Rock abesti mitikoak jotzen ditu taldeak, eta Johan Sebastian Bach eta beste konpositore klasikoen zatiak sartzen dituzte, erakusteko abesti horien jatorria nondik datorren, Valek azaldu duenez.
Martxoaren 8an hiru goi mailako musikari emakume izango dituzte: Raffaella Acelia biolinista, Rebekka Riedel biolontxelo jotzailea eta Esther Barandiaran pianistak kontzertua emango dute. Nuestras cuatro estaciones emanaldia eskainiko dute, Javier Sistiagaren poemek eta Maialen Agirresaroberen irudiek lagunduta.
Atseden pixka bat hartuta, martxoko azken asteburuan bueltatuko da Lesoinu. Musika eskolako bandaren kalejira, abesbatzen kontzertua, diana… eta beste hainbat ekitaldi izango dira asteburu horren osagaiak. Mindfulness tailer bat emango du, halaber, Iñaki Berak, kontzertu batean nola jokatu behar den ikasteko. Ekitaldi irekia izango da, bizitzako beste hainbat arlotan baliagarri izateko modukoa.
Apirileko ekitaldiak, gehienbat ikasleei begirakoa izango da. Espinak gogorarazi duenez, 0 eta 80 urte arteko ikasleak dituzte, eta horiek guztiak hartuko dituzte kontuan Lesoinu antolatzerakoan. Horrela, aurtengo ekitaldia biribiltzeko, eguneko zentroraino hurbilduko dira Sutargi abesbatzakoak.
Egitarau osoa eta xehetasun guztiak ikusteko, egin klik esteka honetan.
