[Galeria] Pilotaririk onenak Antxoko Ibaiondon bildu dira
Emakume Master Cup txapelketaren final laurdenak jokatu ziren atzo Antxon, zale askoren aurrean. Etxaniz-Etxebeste eta Arrieta-Jaka, pilotari onenen artean.
Iera Agirre eta Maite Ruiz de Larramendik (urdinez) 8-18 irabazi zieten Ane Arteaga eta Maider Mendizabali (gorriz). Erakustaldi bikaina eman zuten atzo Ibaiondo pilotalekuan bildu ziren 16 pilotariak. Laboral Kutxa Emakume Master Cup pilota goxoko txapelketaren final laurdenak jokatu ziren Pasai Antxon. Goi mailako pilota ikusteko ezohiko aukera izan zen eta antxotarrek erantzun aparta eman zioten zitari, jende ugari batu baitzen harmailetan.
Nabarmentzekoa da egungo txapeldun Leire Etxanizek sasoi betean jarraitzen duela. Irantzu Etxebesterekin batera 18-8 hartu zituzten mendean Andrea Aldaregia eta Ane Urkizu. 10 tantoko tartearekin amaitu arren, tanto gogorrak jokatu zituzten lau pilotariek.
Eneritz Arrietak eta Amaia Jakak bestalde, nagusitasun osoz gainditu zituzten Uxue Larrea eta Lierni Gartziarena, 18-1. Neurketa oso azkarra izan zen eta Arrieta zalantzarik gabe, maila onena erakutsi zuena defentsan, baita tantoa amaitzerakoan ere.
Galeano ahizpa gazteak hazkunde betean direla erakutsi zuten Ibaiondon. Behetik gorako bidea egiten ari dira Antzuolakoak. Atzo 13-18 irabazi zieten Ainhoa Ruiz de Infante eta Oihana Orbegozori. Eguneko partidarik gogorrena izan zen; 50 minututik gora iraun zuen eta oso lehiatua.
Beteranoen arteko neurketan, Iera Agirrek eta Maite Ruiz de Larramendi nafarrek osatutako bikote sendoak, 8-18 gailendu zitzaien Ane Arteaga eta Maider Mendizabal gipuzkoarrei. Partidaren lehen zatian nor baino nor aritu ziren bi bikoteak. Bigarren zatian ordea, Arteaga eta Mendizabalek behera egin zuten nekearen ondorioz.
Gauzak horrela, finalerdi politak jokatuko dira Elgoibarren hilaren 14ean: Iera Agirre-Maite Ruiz de Larramendi / Irantzu Etxebeste-Leire Etxaniz eta Eneritz Arrieta-Amaia Jaka / Nagore Galeano-Leire Galeano.
Laboral Kutxa Emakume Master Cup pilota goxoko txapelketaren final laurdenen hainbat irudi.
