Independentzia Egunean Oarsoaldeko gazteak saretuko dira
Independentzia Eguna egingo dute martxoaren 14an Oarsoaldean. Eskualdeko gazteek egunean zehar egingo direnetan parte hartzea nahi du Ernaik.
Independentzia Egunaren aurkezpeneko irudia. Oarsoaldeko Ernaik Independentzia Eguna antolatu du martxoaren 14rako, larunbata. Euren asmoa da egun osoko egitarauaren bitartez eskualdeko gazteak elkartu, eta saretzea. Horrela, independentziaren aldeko aldarria lehen lerrora ekarri nahi dute.
“Euskal Herri askea” nahi dute Ernaiko gazteek, “Espainiako eta Frantziako estatuek ezartzen dizkiguten mugekin apurtu. Euskal Herri aske, sozialista eta feminista eraikitzeko ezinbestekoa dugu independentzia”. Bide horretan, gazteen garrantzia nabarmendu dute.
Egitarauari dagokionez, eskualdeko herriak lotuko dituen martxa abiatuko dute hilaren 14ko 10:30ean Donibanetik. Lezo eta Errenteria-Orereta pasata, Oiartzunera iritsiko da mobilizazio ibiltaria. Han, 13:00etan ongietorria eta ekitaldia egingo dituzte, baita herri bazkaria ere. Bazkalostea Malen eta Ekainek girotuko dute.
18:00etan, musikarako txanda: Ekaitz Bortitza, Parrapas (erromeria), Baizera, Bad Sound System eta DJ Txankletak euren kontzertuak emango dituzte.
Bazkarirako txartelak Leozko Tiñelun, Errenteria-Oreretako Sindikaton, eta Oiartzungo Kastro tabernetan daude salgai, hamar euroan.
Aldi berean, Oarsoaldeko Ernaiko kideek oroitarazi dute apirilaren 10etik 12ra Nafarroa erdialdean Bidebat iniziatiba egingo dela, “independentziarako bidea urratzen jarraitzera animatu nahi ditugu eskualdeko gazteak”.
