Batura zikloarekin, nazioarteko musikariak Lezora
Batura zikloaren kontzertua etzi (osteguna) izango da herrian. Euskal Herriko eta nazioarteko musikariak eta errepertorioak batzen ditu zikloak.
Batura musika ziklo berriak Lezon geldialdia egingo du etzi (osteguna) Lezon. Josu Okiñena pianista lezoarrek eta Alexandre da Costa biolin jotzaile quebectarrak kontzertua emango dute 19:00etan Gezalan. Musika zikloaren printzipioak betetzen ditu musika emanaldi horrek: Euskal Herriko eta nazioarteko artisten arteko elkarlana, Gipuzkoako areto txikietan, euskal errepertorioak eta nazioartekoak interpretatuz.
Gaur aurkeztu dute Batura, Donostiako Victoria Eugenia antzokian. Bertan izan dira, besteak beste, Jesus Mari Martiarena Lezoko alkatea, Ion Ponbar Kultura zinegotzia eta Josu Okiñena Musikeneko irakasle eta musikari lezoarra. Okiñena bera izan da zikloa mamitu duena. Zortzi emanaldiko jarduera da, lau Donostian, eta beste lau Gipuzkoako hainbat herritan egitekoak, tartean etzikoa Lezon (Andoainen, Azkoitian eta Zumarragan ere bai egingo dituzte). Okiñenak nabarmendu du Euskal Herriko konpositoreen emaria nazioartekoen mailakoa dela, eta hori balioan jarri eta zabaldu behar dela.
Kontzertuak modu didaktiko, atsegin eta hurbilean egingo direla azaldu du musikari lezoarrak, eta tartean, musikariek hitzez piezen azalpenak emango dituztela. Tamaina txikiko aretoak horretarako aproposak direla erantsi du, ganbera kontzertu tankera hartuz. Gainera, zikloarekin lortu nahi dena da nazioarteko musikariek euren errepertorioetan sartzea euskal sortzaileen lanak.