Ortzimugaren Atlantikaldia martxan: egitaraua osatzeko proposamenak aurkez daitezke
Atlantikaldia jaialdirako proposamenak aurkez ditzakete herriko norbanako eta eragileek, apirilaren 3ra arte. 'Ortzimugak', aurtengoaren leloa.
Jaialdiaren artxiboko irudia. Aurtengo Atlantikaldia irailaren 24tik 27ra da, Ortzimugak leloarekin. Zazpigarren ekitaldia da. Jaialdiaren lantaldea jada lanean ari da ahalik eta egitarau osoena planteatzeko, baina urtero bezala, herritarrei aukera man nahi diete euren proposamenak egiteko. Hala, Atlantikaldiaren webgunean egin daitezke egitaraua osatzeko proposamenak, apirilaren 3ra arte.
Baldintza zehatz batzuk izan behar dituzte proposamen horiek, honakoak:
- Urtean zehar antolatutako ohiko ekitaldien errepikapena ez izatea, hots, berrikuntza bat barneratzea.
- Herritarren parte hartzea sustatzea.
- Eragile ezberdinen arteko elkarlanetik sortutako ekimena izatea.
- Kaletarra izatea, herritarrei topagunerako aukera eskaintzea.
- Kultur aniztasuna bultzatzea.
Jasotako proposamen guztien balorazioa egin ondoren, jaialdiko lantaldea maiatzaren 29a baino lehen jarriko da igorleekin harremanetan. Informazio eta argibide gehiagorako posta elektroniko helbide bat eskuragarri dago.
‘Ortzimuga’
Zazpigarren edizioa Ortzimugak lelopean eraikiko dute “Ortzimuga elkargunea da, zeruak lurrarekin bat egiten duen puntua, egunsenti eta ilunabarren sorlekua, eguna eta gaua, perspektiba anitzak bateratzen diren lerroa”.
Errenteriak 700 urte beteko dituenean, orainaldiaren eta etorkizunaren arteko inflexio puntua izan nahi du Atlantikaldiaren ortzimugak. Kontzeptu horiek guztiak bere egingo ditu Atlantikaldiak eta aurrera begirako aukeren eta ikuspegien multzo bezala ulertuko du aurtengo leloa. Gainera, jaialdiaren antolaketa zeharkakotasunaren kulturan oinarrituko dute, eragile eta erakundeen arteko konexioak bilatuz.
