Bi proba eta bi garaipen Maddi Tarragonarentzat
Ongi baino hobeto abiatu du denboraldia Maddi Tarragonak bigarren garaipena eskuratuta. Senior mailan, Ion Carballok bigarren postuan amaitu zuen, onenen artean dagoela bermatuz.
Zalantzarik gabe indartsu hasi du denboraldia Maddi Tarragona palista errenteriarrak. Igandean Irunen jokatutako Neguko Euskadiko Txapelketan urrezko domina lortu zuen Tarragonak kadete mailan. Donostia Kayakeko Eider Irazu izan zen beste behin Tarragonaren aurkari nagusia, baina azken metroetan nagusitasunez gailendu zitzaion errenteriarra.
Pasaia Kayakeko beste apustu nagusia, Ion Carballok, palista onenen artean izango dela erakutsi zuen. Bidasoa ibaiko uretan, proba aparta burutu zuen Carballok eta bigarren postuan bukatu zuen senior mailan, Iñigo Peña palista olinpikoaren atzetik. Aipamen berezia, Martin Benavidesentzat, lau ehunekoengatik ez baitzuen txapela lortu kadete mailan. Zilarrezko domina beraz harentzat.
Taldea bera ere podiumean amaitu zuen eguna. Palista guztiek egindako lanari esker, hirugarren postuan bukatu zuen Pasaia Kayak, taldekako sailkapenean.