'Pantheon' obraren aurrestreinaldia Juanba Berasategin egingo da
'Pantheon' da Marga Altolaguirre sanjuandarrararen azken lana, zeinak Pasaiako Udalaren Kultura eta Hezkuntza sailaren babesa jaso duen. Asteburuan hiru emanaldi eskainiko dira Donibanen.
Donibaneko Kulturgunean aurkeztu dute 'Pantheon'. Marga Altolaguirre hirugarrena, ezkerretik hasita. Arte eszenikoen sustapenean aurrera pausuak emateko aukera emateagatik “benetan eskertuta” dagoela adierazi du gaur Marga Altolaguirre antzerkigile eta produktoreak. Donibaneko Kulturgunean egindako agerraldian, Pantheon antzezlan berriaren aurkezpena egin du gaur artista sanjuandarrak.
Obraren estreinaldi ofiziala Dferia Donostiako Nazioarteko Arte Eszenikoek azokan egingo bada ere, aurrestreinaldia Donibaneko Juanba Berasategin egingo da, areto hura ezinbesteko izan delako Pantheon sortu ahal izateko, “teknologiarekin entseguekin etab. gauzak probatu eta saiatzeko aukerak eman dizkigu” adierazi du Altolaguirrek. Hiru saio egingo dira, hilaren 6 eta 8an euskaraz eta 7an gaztelaniaz. Hiru emanaldiak 19:30ean izango dira.
Eskainitako babesaz gain, Juanba Berasategi aretoa ere utzi diote Altolaguirreri eta haren taldeari, egoitza artistiko gisa erabili zezaten. Artistek maiz korrika eta presaka antolatu behar dituzte emanaldiak, aretoak erabiltzeko denbora gutxi baitute. Pantheon ordea, presarik gabe prestatu ahal izan dute eta horrek emaitzan eragina izango du. Halako aukerek, “arte eszenikoen profesionalizazioa” dakartela nabarmendu du Marga Altolaguirrek.
Hainbatetan adierazi dio Pasaiako Udalaren Kultura eta Hezkuntza sailari bere esker ona artistak “udalaren babesik gabe ez zen posible izango tankera honetako antzerki bat egitea”. Udala izan zen proiektuan interesa agertu zuen lehen eragilea eta haiei esker beste hainbat ate ireki zitzaizkiela aitortu du “udalaren atzetik Gipuzkoako Foru Aldundia, Eusko Jaurlaritza eta herriko elkarteak iritsi ziren, baturak indarra dakar”. Finean, obra artistiko baten atzean dagoen “lana eta sentiberatasuna” errekonozitzeko gai izan direla esanez amaitu du Altolaguirrek.
Sortzailearekin batera. Pasaiako alkate Izaskun Gomez eta Kultur zinegotzi Jorge Aguayo izan dira. Kulturaren sustapenean izan dezakeen pisua dela eta, egoitza artistikoen aldeko apustua egingo dutela adierazi du Gomezek, “Pasaian arte eszenikoen gabezia eta erronkei aurre egiteko modua da obrak sortu eta garatzeko espazio bat eskainiz.”. Pantheon beraz, egoitza artistiko horien lehen probaren ondorioa da.
Azken hilabeteetan zehar, Juanba Berasategi egoitza artistiko gisa erabiltzeko eskaerak jaso dituztela esan du Gomezek. Amaitu baino lehen, Miriam Cano, kultur zinegotzi ohiaren papera gogora ekarri du alkateak, proiektuaren jatorrian garrantzia handikoa izan zen eta.
