Abian da auzo konpostaren jarraipen kanpaina
Bost auzo konposta gune daude gaur egun Lezon, Arretxenen, Lopenen, Aralarren, Andreonen eta Altamiran. 2019an 16.881 kilo konpost ekoitzi ziren.
Guillermo Lazon auzoko konposta gunea. Argazkia: Lezon Ondo Ai Ginen. Martxan da dagoeneko Lezoko auzoen konpost ekoizpenaren jarraipen kanpaina berria, hondakin organikoa herrian bertan eta modu jasangarrian kudeatzeko. Gaur egun bost auzotan topatu daitezke konposta guneak; Arretxenen, Lopenen, Aralarren, Andreonen eta Altamiran. Gune guztien erabilera egokiak ziurtatzearren jarraipen bisitak egingo dira, zalantzak argitu eta iradokizunak emateko.
Joana den otsailaren 27an lehen bisita egin zen, kanpainari hasiera emanez. Lehen saio hartan, aurtengo helburu nagusiari eutsi zioten, denen artean konpost ekoizpenari bultzada ematea alegia. Iaz, erabiltzaileen kopuruak behera egin zuen 70 erabiltzailetik, 67ra, eta beherakadari buelta eman nahi diote. Dena dela, iaz ekoitzitako konpost kopurua nabarmendu du Lezoko Udalak; 16.881 kilo orotara.
Erabilera egokia
Konpostagailuekin iaz izandako arazoei irtenbidea eman nahi dio udalak. Hori dela eta, jarraipen bisitek arreta berezia izango dute, sor litezkeen arazoak konpontzeko. Udalak emandako datuen arabera, konpostagailuen %55a egoera egokian daude eta %44a nahikoan. Arazo gehienek, tenperatura baxuekin eta gehiegizko hezetasunarekin dute zerikusia.
Jarraipen bisitak hilabete bakoitzeko azken ostegunean izango dira, uztailan eta abuztuan izan ezik . Goizeko 9:00etan izango dira eta 45 minutuko iraupena izango dute. Dena dela, edozein ordutegi aldaketa ematekotan, aldaketa horien berri emango luke udalak. Informazio gehiagorako jarri harremanetan konpost guneen arduradunekin, posta elektronikoz, ala telefonoz, 647057402 zenbakira deituz.
