'Delituaren prebentziorako eta segurtasun plana' aurkeztuko du EH Bilduk
Hilaren 9an aurkeztuko du Pasaiako EH Bilduk plana, Antxoko Kultur Etxean. Ekitaldi irekia izango da, nahi duten herritarrek parte hartu ahal dezaten.
EH Bilduko kideek herritarren iritziekin osatu nahi dute segurtasun plana. Delituaren prebentziorako eta segurtasun plana aurkeztuko du Pasaiako EH Bilduk, hilaren 9an (astelehena) Antxoko Kultur Etxean 19:00etan. Herritarrei parte hartzera deitu ditu koalizio abertzaleak, “herritar zein eragile ororen parte hartzea bermatu nahi dugu, ahalik eta iritzi eta proposamen gehien jaso ahal izateko”. Jasotako proposamenak aintzat hartuko dituzte haien planean eta Bozeramaile Batzordeari aurkezteko konpromisoa hartu dute.
Landutako proposamena transbertsala eta errealitateari lotutakoa dela diote koalizioko iturriek, “segurtasunak hainbat herritar kezkatzen dituela aitortuta, bizitza duinaren bidean beldurrak uxatzea beharrezkoa dela uste dugu”. Plan berriak, “populismotik ihes egingo du” azterketa sakonaren alde, delinkuentzia eta segurtasun falta, beste arazo sozial batzuen ondorio baino ez direlako. Hezkuntza, gizarte, kultur ala kirol politikak izango dira osagai nagusiak “konponbidearen errezetan”.
Planak sei ildo ezberdin landuko ditu; Udaltzaingoaren berregituratzea eta eredu aldaketaz gain, bizikidetza, integrazioa, hiritartasuna eta espazioko esku hartzea barnebiltzen dira. Pasaiako EH Bildu, Laurak Bat, ELA, LAB eta Udaltzaingorekin batzartu, planaren berri emateko. Hurrengo urratsa, herritarrei aurkeztea izango da EH Bildurentzat “PSE eta EAJ-k osatutako udal gobernuak nahiko azaleko erantzuna eman duela uste dugu, polizia erantzuna handitzea, bideokamerak jartzeko proiektua eta argiteria hobetzea ez zaizkigu iruditzen arazo honi eman dakizkiokeen irtenbiderik onena.
