Neska gazteak, zirikatzeko prest
Ekiñe Ramos eta Laia Urretabizkaia Zirika Neska Talde sortu berriko kide dira. Euren jardunaz eta M8ra begira dituzten asmoez mintzatu dira HITZArekin.
Ekiñe Rivas eta Laia Urretabizkaia, Zirikako kideak. Martxoaren 8a, Emakumeen Eguna, gainean da, eta Errenteria-Oreretako eragile feministak azken prestaketa lanekin dabiltza igandean kaleak aldarriz betetzeko.
Lanean gogor ari den eragile feministetako bat Zirika Neska Taldea da. Hasiberriak dira, duela hiruzpalau hilabete hasi zuten euren jarduna, eta igandekoa izango dute lehen Martxoaren 8a. Ilusioz eta gogoz ari dira. Ekiñe Ramos eta Laia Urretabizkaia Zirika Neska Taldeko kide dira, eta taldearen nondik norakoez eta Martxoaren 8rako dituzten asmo eta helburuez mintzo dira Hitza-rekin. Argi eta ziur hitz egiten dute.
Zirika «Errenteria-Oreretako neska gazte feministez osatutako taldea da», zehaztu du Ramosek. Eragile feminista hau herriko neska gazteen jarduna uztartzeko sortu da. «Bakarrik jende gaztea biltzen gara. 16 eta 20 urte bitarteko neskak gaude taldean. Beharra ikusten dugunean biltzen gara lanerako. Gure ustez, bide onetik goaz», konfirmatu dute neska gazteek.
Errenteria-Oreretan bada talde feminista bat, baina Zirikako kideek ere euren ekarpena egin nahi izan dute, «neska gazteak elkartu, mugitu eta feminismoa sustatzeko». Adierazi dute talde feministako jendea helduagoa dela, eta batzuetan arrotza egiten zaiela haiengana bakarrik joatea. «Guk argi genuen neska gazteak elkartu behar ginela herrian mugitzen hasteko. Horregatik sortu dugu taldea», eutsi du Urretabizkaiak.
M8ko jarduerak, prest
Zirika Neska Taldeko kideak mobilizatuko dira, eta euren ekarpena egingo diote Errenteria-Oreretako Martxoaren 8ari. Horretarako, zenbait jarduera prestatu dituzte euren jarduna bistaratzeko. «10:00etatik 11:45era Herriko Plazan jarriko gara eta gure logoaren margoketa egingo dugu. Hamaiketako txiki bat ere prestatu dugu bertaratzen den jendearentzako. Horrez gain, txapa batzuk ere egin ditugu igandean bertan saltzeko. Ondoren, manifestaziora batuko gara», dio Ramosek.
Mobilizaziorako dei argia egin dute neska gazteek, Martxoaren 8a aldarriz betetzeko. Zirikatzeko jaio dira, eta zirikatzen jarraituko dute. Lehen Emakumeen Egunean gogoz jardungo dute, euren ikuskera eta esperientziatik egunari, eta Errenteria-Oreretako mugimendu feministari ekarpena egiteko.
