Zinegoak Oiartzunen izango da
Zinegoak nazioarteko jaialdian diren sei lanekin emanaldia egingo dute udaletxeko areto nagusian, hilaren 13an, 19:00etan hasita.
'Mi pequeño gran samurai' lanaren fotograma. Zinegoak Bilboko Gaylesbitrans Nazioarteko Zinema eta Arte Eszenikoen Nazioarteko Jaialdiko hainbat lan ikusteko aukera izango da Oiartzunen. Abian da jaialdia, igandera arte. Hilaren 13an, bertako sei film laburren proiekzioa egingo da udaletxeko areto nagusian. 19:00etan hasiko da emanaldia, doan da. Oiartzungo Udaleko Feminismo Sailak antolatu du, genero aniztasuna erdigunera ekartzeko.
Film guztiak jatorrizko bertsioan emango dira, euskarazko eta gaztelaniazko azpitituluekin. Euskal Herriko eta nazioarteko (Mexiko, Suedia, Costa Rica eta Danimarka) laburrak izango dira Oiartzunen emango dituztenak. Honakoak: Mi pequeño gran samurai (2018an buruaz beste egin zuen Ekai Lersundi ondarruar gazte transexualari buruzko dokumentala, Arantza Ibarrak egina), Jess, Adlib, Min värld i din; XY eta La mariachi.
