[Bideoak eta galeria] Milaka emakumek aldarri morez bete dituzte herriko kaleak
Kalera atera dute feminismoaren indarra eta aldarria gaur Errenteria-Oreretan. Bereziki jendetsua izan da eguerdiko manifestazioa.
Gamon Zumardian bukatu da mobilizazioa. Izugarria eta jendetsua izan da Errenteria-Oreretako Martxoaren 8ko manifestazioa. Milaka emakume bildu eta mobilizatu dira herriko kaleak aldarri morez betetzeko. Batukada feministak girotuta, 12:00etan ekin diote mobilizazioari Herriko Plazatik. Niessengo biribilgunean Zirikako neskek, Feminismora batu, heteropatriarkatua zirikatu lelopean, parodia moduko bat egin dute emakumeek egunerokoan bizitzen dituzten egoera lazgarri batzuk salatzeko.
Iztietatik barrena, Alabergako biribilgunera iritsi da manifestazioa. Bertan, bizitza erdigunean jarriz, Oarso taldeak emakume errefuxiatuen aldeko aldarria egin du: Asiloa eta mugikortasuna eskubideak dira. Emakumea + errefuxiatua = 11urraketa lelopean. Ondoren, manifestazioa Biteri kalean barrena murgildu da «inor ez da ilegala», «non daude gure eskubideak?», «erasorik ez erantzun gabe» edota «ez dugu atzera egingo» aldarriekin, besteak beste. Biteri kalearen amaieran, pentsiodunak batu dira mobilizaziora Jubilatuen alde borrokan kantupean. Zumardira iritsi eta manifestazioa amaitu baino lehen, etxeko langile migranteen aldarriak gehitu zaizkio manifestazio jendetsuari.
Amaitzeko, txalapartarien laguntzaz eta aldarrikapenez beteriko abesti eta bertso bat medio, ekin diote manifestua irakurtzeari Zumardiko kioskoan. Bi mezu nabarmendu nahi izan dituzte. Alde batetik, azken bi urteetan emakumeek biltzeko eta antolatzeko izan duten gaitasuna azpimarratu dute. Eguneroko injustiziak bultzatuta, borroka masa izugarria azaleratu du feminismoak, borroka global bat bilakatuta. Gobernuek feminismoaren eskarien aurrean azaltzen duten pasibotasuna eta euren politika neoliberalak ere kritikatu dituzte.
Bestalde, gizonezkoen mentalitateaz inposatutako sistema honek bere boterea ziurtatzeko emakumeek jasaten dituzten erasoak sakontzen jarraitzen dutela salatu dute. 2019. urtean, milaka izan dira mundu guztian zehar eraso matxistak jasan dituzten emakumeak. Esaterako, Oarsobidasoan 387 eraso matxista denuntziatu ziren iaz. Azkenik, azpimarratu dute matxiruloen aurrean borrokan jarraituko dutela, eta emakumeak antolatzera deitu dituzte.
