[Galeria eta bideoa] Matxismoak aurrean izango ditu
Emakumeen gidaritzapean, ehunka lagun atera dira gaur kalera martxoaren 8aren harira. Matxistei, faxistei eta neoliberalei argi utzi diete; "ez dira pasako".
Ehunka lagun irten dira kalera Antxon, Mugimendu Feministaren gidaritzapean. Aldarrikapenerako goiza izan da gaurkoa Pasai Antxon. Jai giroan, baina egunaren garrantziaz jakitun izanda, ehunka lagun irten dira gaur kalera, emakumeak gidatuta, martxoaren 8an behin betiko berdintasuna eskatzeko. 11:00etan jarri dute hitzordua Antxoko gure zumardia morez liraintzeko. Muntaiari eta apaintzeari ekin ondoren, 12:00etan tentsioak baretzeko unea izan da. ‘Marianito’, hau da, bermutaren unea izan da, izan ere, Emakumeen Eguna, borrokarako eguna da, baina baita alaitasun eta ospakizunerako ere.
Apurka-apurka Gure Zumardia goraino bete da. Mugimendu feministaren hainbat kidek hitza hartu dute ordua. Martxoaren 8ari izena eman zioten emakume langile horiek oroitu dituzte, baita aurretik dagoeneko bazterkeriaren aurka borrokatu zuten horiek ere.
Manifestazioan haur, gazte zein helduek parte hartu dute, betiere, emakumeak buru zirela. Indar erakustaldi handiena, Nafarroa etorbidean egin dute, etenda egon baita hainbat minutuz. Amaiera, Gure Zumardian izan da berriz ere. Emakume batek Trintxerpen jasandako eraso matxista gaitzetsiz hasi dute adierazpena. Bukatzeko argi adierazi dute feminismoa izaera iraultzailea, “matxistek, faxistek eta neoliberalek aurrean izango gaituzte”. Orduotan, bazkaltzen ari dira, indarrak hartzen, arratsaldean manifestazioa baitute Donostian.
Hauek dira martxoaren 8ak Antxon utzitako irudiak eta bideoa.
