Moitan aurkeztu da Pasaia Itsas Festibala
Bi herriek sinatutako kolaborazio hitzarmenari jarraiki eta harremanak estutze aldera, Portugalen aurkeztu zuten larunbatean maiatzaren 28tik ekainaren 1era egingo den Pasaia Itsas Festibala.
Moitako udaletxean egin zen Pasaia Itsas Festibalaren aurkezpena. Moita (Setubal, Portugal) eta Pasaiak, harremanak estutzen jarraitzen dute. Larunbatean Pasaia Itsas Festibalaren aurkezpena egin zen Moitan, herriko udalak antolatuta. Bi herriek sinatutako hitzarmen zabaltzea adostu dute bi udalek eta horren baitan Portugal aurtengo ohorezko gonbidatua izatea adostu zuten.
Ekitaldian parte hartu zuten Rui Garcia Moitako alkatea, Izaskun Gomez Pasaiakoa eta Xabier Agoten Pasaia Itsas Festibalaren zuzendaria. Itsas ondarea aldarrikatu zuten Moitan eta Pasaiak itsas industria gune gisa izandako garrantzia nabarmendu zuten.
Era berean festibalak iraun bitartean, Moita inguruko sei ontzi Pasaian izango direla jakinarazi zen ekitaldian. Moitaz haratago, Portugal erdigunean jarriko duten hainbat ekintza egingo dira; gastronomia ala musikarekin lotutakoak besteak beste. Portugalek gainera, tripulazioz eta ordezkari publikoez osatutako ordezkaritza talde bat bidaliko du.
