Uhinak saretzen jarraituko dute
Arrosa Irratien Sareak Arrosa jardunaldia antolatu du hilaren 28an. Errenteria-Oreretan izango da zehazki, jardunaldi horren IX. ekinaldia eta goiz eta arratsaldez egitarau oparoa antolatu dute.
Arrosa Irratien Sareak Arrosa jardunaldia antolatu du hilaren 28an. Errenteria-Oreretan izango da zehazki, jardunaldi horren IX. ekinaldia eta goiz eta arratsaldez egitarau oparoa antolatu dute. Aurtengo jardunaldietako kokalekua ez dute ausaz aukeratu, izan ere, Zintzilik Irrati Libreak 35 urte beteko ditu aurten, eta hari keinu egingo diote. Bergaran, Zarautzen, Gernikan, Bilbon, Gasteizen, Baionan, Ondarrun eta Zumarraga-Urretxun antolatu ditu jardunaldi horiek Arrosak.
Eguna bi zatitan banatu dute eta goizean arlo teoriko praktikoa landuko badute, arratsaldez arlo ludikoaren txanda helduko da; hala, goiz partean hitzaldiak eta tailerrak antolatu dituzte, eta arratsaldean, berriz, bingo musikala, karaokea eta kontzertuak. Egitarau hori, gainera, herriko hainbat txokotara zabalduko dute.
11:30ean hasiko dira jardunaldiak. Irratigintza eta hizkuntza ez sexista hitzaldiak zabalduko du eguna Mikelazulo elkartean. Ordu berean beste bi hitzaldi emango dituzte, Radio enlace sistema praktikara eraman. 5GHz frekuentzia librean, Gaztaiño auzoko egoitza berrian, eta Zer da podcast bat? Tailer teoriko praktikoa zintzilik irratian bertan. Bazkaria egingo dute 14:30ean Gaztaiñoko Bukagaitz elkartean, eta bazkalosterako Arrosako Bingo musikala eta karaokea prestatu dituzte.
Kontzertuan txanda helduko da ondoren, eta 21:15ean hasita, Floxbin, El Quinto Con Tenedor eta Fetitxe taldeak arituko dira Niessen aretoan.
Jardunaldietan parte hartzea doakoa eta erabat librea da, eta irratigintza maite duen edonor gonbidatu dute parte hartzera: “Eta irrati bat martxan jarri nahi duen lagunarte edo kolektiboak ere ongi etorriak izango dira. Finean, Arrosa Irrati Sarearen helburua Euskal Herriko irrati ezberdinak saretzea baita”.