Bekoerrota kiroldegitik etxean kirola egiteko plataforma ahalbidetu dute
Bekoerrota kiroldegiak baliabideak eman nahi dizkiete herritarrei etxetik ariketa fisikoa egin dezaten. Bideo sorta osatzen ari dira BPXport-eko langileak.
Ariketetako baten bideoaren irudia. Itxialdi egun hauetan etxean ariketa fisikoa egiteko baliabideak ezarri dituzte Lezoko Bekoerrota kiroldegiko langileek. Kiroldegia itxita dago, baina langileak lezoarrei jarduera fisikoa etxera eramateko lanean ari dira.
Horri begira, herritarrentzat irekia den plataforma sortu dute, askotariko ariketak egiteko, kirola etxetik egiteko hainbat bideorekin. Bost jardueratan banatu dituzte horiek: jarduera koreografiatuak, jarduera funtzionalak, gimnasia leuna, familian egiteko jarduerak, eta lehen sorospenei buruzko bideoak.
Euskaraz eta gaztelaniaz daude edukiak. BPXport-eko (Lezoko kiroldegia kudeatzen dute, besteak beste) monitoreek egindakoak dira. Hala, egunero bideoak egitea da euren asmoa, tartean, zuzeneko emanaldiak izango direla.
