Lezoko Laboa farmazia: "Birus txiki bat ez da izango bihotz zabaleko herri hau menperatzeko gai!"
Laboa farmaziako langileek egunotan bizi dutenaren berri eman dute sare sozialetan zabaldu duten mezu batekin. Neurriak errespeta daitetezela eskatu dute.
Laboa farmaziaren ataria. Lezoko Laboa farmaziako langileek sare sozialen bitartez egunotan bizitzen ari direna kontatu dute. Horrez gain, herritarrei oroitarazi diete itxialdiaren gaia serioa dela, eta denen esku dagoela koronabirusari aurre egitea, bakarkako eta kolektiboaren konpromisotik, ezarritako aginduak betez.
Jarraian, hitzez hitz, zabaldu duten mezua:
Zuek ia astebete daramazue konfinamendua egiten, eta guri ere iritsi zaigu horretarako unea. Aspaldi ez dizuegu ezer idatzi, ez da izan gogo faltagatik, baina honelako osasun alarma batean farmaziako lanak gainezka egin du eta bertaratu direnei laguntzea izan da gure lehentasuna.
Orain, ordea, farmaziara zatoztenak babesteko eta zerbitzua eman ahal izaten jarraitzeko, geure burua babestu behar dugu, lantaldeak egin ditugu eta txandaka arituko gara, elkarrekin ahalik eta denbora gutxien egongo gara honela. Denon artean birus hau geratuko dugu.
Jakingo duzue honezkero, herrian kasu positibo batzuk azaldu direla, horregatik babes neurriak errespetatzeko eskatzen dizuegu. Dagoeneko badakizue ahal den neurrian behintzat etxetik ez dela irten behar, baina gogorarazi nahi dizuegu farmaziara edo herriko beste dendaren batera joatean, errespetatzeko arren segurtasun tartea, guretzako oso gogorra baita gaur oraindik jendeari mostradoretik urrutiratzeko esan beharra, eta are gogorragoa hori esanik jendeak haserre alde egitea. Denok izan gaitezke birusaren eramaile eta denon osasunagatik hobe dugu hainbeste jende pasatzen garen leku hauetan (farmazia, harategia, okindegia, arrandegia…) ezer ere ez ukitzea. Denok gure esku dagoena egiten badugu, herriko saltzaileok zuen ondoan jarraitu ahal izango dugu, itxialdi luze honetan inori ez dakion ezer falta.
Bukatzeko, ezin aipatu gabe utzi arratsaldeko zortzietako zuen txalo eta musika doinuak. Balkoira irten eta begiak malkoz betetzen zaizkigu. Lanegun gogorraren ostean, nerbioak airean eta beldurra bor-borka etxeratzerakoan, zuen esker txaloek gogorarazten digute etxean sartuta dagoen herri honek babesa eta zaintza merezi dituela, eta gure esku dagoen apurra egiten jarraitu behar dugula.
Birus txiki bat ez da izango bihotz zabaleko herri hau menperatzeko gai!!
