Portu Agintaritzak koronabirus kasu positibo bat ezkutatu duela salatu du langileen batzordeak
Eriak positibo eman eta bost egunetara jakin zuten gainontzeko langileek, "iturri ez ofizialen bidez". Beste hiruk sintomak dituztela jakinarazi du Pasaiako Portu Agintaritzaren Langileen Batzordeak.
Pasaiako Portu Agintaritzak langile batek COVID-19an positibo eman zuela jakinarazi berri du LAB sindikatuak. Kapitain praktiko batek hilaren 13an (igandea) eman zuen positibo eta gaur jakin dute “iturri ez ofizialen bidez” langile bat koronabirusak jota dagoela, Pasaiako Portu Agintaritzaren Langileen batzordeak jakinarazi duenez. ELA, LAB, CCOO eta UGT sindikatuek ordezkaritza dute batzordean.
Ordutik eta gaur arte, langileek jardunean jarraitu dutela adierazi du sindikatu abertzaleak “egun normal bat izango balitz bezala eta inongo berrogeialdirik egin gabe”. Langile batzordeko kideak, kezkatuta dira, “informazio hau ezkutatu da eta horrek izurritea Pasaia osora zabaltzea eragin dezake”. Interes ekonomikoak lehenestea egotzi diete PPAren agintariei, Felix Garciaindia buru dutela.
Ondorioak izan ditzake, beste hiru langile baitaude sintomekin Praktikoen Korporazioan. Interes ekonomikoen defentsan, langileen eta gainontzeko herritarren osasuna jomugan jartzen ari dira, argi baitute lantoki, lonja, aldagela edota ibilgailuetan ezin direla prebentzio neurriak bermatu, “kutsatzeko arriskua begi bistakoa da”.
Azken egunetan segurtasun egoerak hobera egin duela esan dute, baliabideak jaso baitituzte tartean Norbera Babesteko Ekipamenduak. Hala ere, langileen batzordeko kideak haserre dira, PPAk izurritearen mehatxuari erantzuteko egin duen kudeaketarekin. Koronabirusa prebenitzeko neurrietan eta koordinazioan “huts egin” duela nabarmendu dute.
Egoera bereziki larria dela uste dute, PPAk muzik egin baitio bere ardurari, “enpresa bakoitza bere langileen erantzulea da, baina PPA da azken erantzulea, Portuen Legearen arabera, langileen osasuna arriskuan jartzen duen edozein larrialdiren aurrean”. Informazio eta prebentzio ezaren aurrean, koronabirusaren hedatzea eteteko babes neurri propioa ezartzera deitu du langileek batzordeak.