Agustin Barcia, Trintxerpe KEko harrobiaren entrenatzaile nekaezina
Hilaren 17an zendu zen Agustin Barcia, Trintxerpeko Kirol Elkarteko harrobian urte askoz ibilitako entrenatzailea.
Agustin Barcia, eskuinean alkandorarekin, jokalari gazteez inguratuta. Aurreko astean Trintxerpe Kirol Elkarteak bere ikurretako bat galdu zuen. Hilaren 17an zendu zen 83 urte zituela Agustin Barcia, Trintxerpeko harrobian entrenatzaile garrantzitsua izandakoa. Bizitza osoa eman zuen jokalari gazteekin lanean. Soinurik egin gabe joan da Barcia baina Trintxerpe KEtik pasa diren ehunka jokalariek, argi dute asko zor diotela gizonari.
Tritxerpetar harroa izanik, bere herriko talde apalaren maitalea zen Barcia eta bereziki gazteak hezten laguntzea zuen gustuko “hamarkadak eman zituen gazteekin lanean, maila guztietan. Sasoia bukatzen zenean, berak ez zuen atseden hartzen, uda hurrengo denboraldia prestatzen hasteko baliatzen baitzuen”, azaldu du Joseba Sein, Barciaren ilobak.
Sein bera, Trintxerpe KEko zuzendaritzako kide da eta aurretik jokalaria ere izan zen eta badaki Barciaren izena denek ezagutzen dutela taldean, belaunaldi ugarik haren agindutara jokatu zuten eta. Bizitza osoa harrobian emateaz gain, futbol eskolaren sorreran ere zeresan handia izan zuen Barciak. Hori izan zen Barciaren azken ekarpenetako bat, eta hori da zalantzarik gabe Trintxerpek KEren oinarri nagusietako bat gaur egun.
