Andreone itxita dago; eLiburutegia ez
Andreone Lezoko Udal Liburutegitik oroitarazi dute eLiburutegia izeneko Interneteko plataforma erabil daitekeela edukiak etxera eramateko.
Andreone Lezoko Udal Liburutegia. Andreone Lezoko Udal Liburutegia itxita dago, hori jakina da. Baina Andreonetik jakinarazi dute eLiburutegiaren aukera balia dezaketela lezoarrek: Interneten bidez eduki digitalen irakurketa errazten duen plataforma da; irakurketa hori streaming bidez, ordenagailuarekin edo gailu mugikorretatik egin daiteke. Gainera, orain, ikus-entzunezkoak online ikusteko aukera ematen du.
Plataformako edukiak erabiltzeko Euskadiko Irakurketa Sare Publikoko bazkide izan behar da. Baten batek hara iristeko pasahitza ahaztu badu, Andreoneko lagunek berri bat emateko aukera dute. Gerta daiteke, aldi berean, zerbitzua baliatu nahi izan eta Andreoneko erabiltzaile ez izatea; kasu horretan 943 51 95 92 telefono zenbakira (goizez) dei daiteke, edo posta elektroniko mezua idatzi, behar diren datuak jasotzeko.
