Elkar zaintzeko saretu da Gaztaño
Egungo egoerak kezkatuta, auzotar talde batek, auzokoak saretzea eta babeserako zein elkartasunerako iniziatiba abiatzea erabaki zuen Gaztañon pasa den hilaren 15ean. Orduz geroztik, 114 bizilagun daude saretuta berariaz sortutako whatsapp talde batean.
Gaztaño, konfinamendutik ikusita. Argazkia: Ixiar Garcia Egungo egoerak kezkatuta, auzotar talde batek, auzokoak saretzea eta babeserako zein elkartasunerako iniziatiba abiatzea erabaki zuen Gaztañon pasa den hilaren 15ean. Orduz geroztik, 114 bizilagun daude saretuta berariaz sortutako whatsapp talde batean. Ixiar Garcia Gaztañoko auzoko bizilaguna da eta sare horretako sustatzaile eta kidea, “bizi dugun egoerarekin zerikusia duten gaiak partekatzen ditugu taldean. Oso lagungarria da, garrantzitsua, auzoaren gaineko informazioa iristen ari delako bertara, bestela jasoko ez genuena”.
Etxebizitza bakoitzean zein adineko pertsonak bizi diren eta zein behar dituzten ere aztertu dute, eta sare horretan ari diren hainbat bizilagunek, gainera, Errenteriako Udalak martxan jarri duen Zaintza Sare Komunitarioan boluntario aritzeko izena eman dute, “zaurgarrienei behar dituztenak ari da zaintza sare horretatik bideratzen udala. Gaztañon sortu dugun sareari dagokionean, elkartasun keinuak adierazteko espazioa bihurtu da, eta adierazpen horiek modu askotakoak dira: haur eta familien egoeraz arduratuta, zaintzan eman behar dugun denbora hori ahalik eta goxoen emateko modu sortzaileenean pasatzeko ideiak ari gara, Artisten Klubaren bidez, eta liburuen trukerako gunea ere jarri dugu”.
Bideoklipa ere martxan dute. Erre zenituzten sorginak kantaren gainean bideo txikiak osatzen ari dira auzotarrak etxean dituzten mozorroak baliatuta, ondoren denak elkartuta osatzeko. Bestelako zalantzen gainean ere aritzen direla zehaztu du, “zaintza partekatua duten familien artean sortzen diren arauak partekatzen ditugu eta bakoitzak bizi dituenak jasotzen ari gara, lagungarri direlako besteentzat ere”.
Hondakinen kudeaketari ere erreparatu dio Gaztañon sortutako sareak, eta “ardura” eta”kontzientzia” eskatu, “izan ere, langile asko dabiltza hondakinen bilketa horretan lanean, eta ez dakigu zein baldintzetan; zaintzea dagokigu, arduraz jokatzea eta orain arte egin ez ditugun gauzak orain ere ezin direla egin argi izatea. Badakigu badagoela jendea auzoan egoera aprobetxatzen ari dena hondakinak ez dagokien lekuetara botatzeko. Jokatu dezagun arduraz”.
Bizilagunak zonaldeka hainbat iniziatiba egiten ari direla esan du ere Garciak, eta Bukagaitz inguruan bingoa antolatzen duten bezala, goiko aldean 20:00etatik aurrera kantuan izaten dira trikitia, panderoa eta oboeak lagunduta, “hunkigarria da oso”.
Keinu politak ere badirela, auzotarren artekoak, nabarmendu du, “badira lanera joan behar dutenak ezin bestean, eta zaintza egitea ez dutenak. Bizilagun batzuk auzokoentzat kozinatzen ari direla jakin badakigu laguntzeko, edota telefonoz elkarri deitzen diotenak animoak emateko… auzoaren nortasuna beti izan da sormena eta aktiboa izatea, eta orain, inoiz baino gehiago”.
