Konfinatuta, baina bizirik daude auzoak
Konfinamenduak sormena lantzeko aukera paregabea eman duen zalantzarik ez da, eta hala erakusten ari dira egunero balkoi eta leihoetatik herritarrak. Errenteria-Oreretaren kasua ere bada, eta horren adibide argia da Santa Klara kalea.
Konfinamenduak sormena lantzeko aukera paregabea eman duen zalantzarik ez da, eta hala erakusten ari dira egunero balkoi eta leihoetatik herritarrak. Errenteria-Oreretaren kasua ere bada, eta horren adibide argia da Santa Klara kalea. Bertan, hitzordua jarri dute egunero 20:00etan osasungintzako langileei aitortza txaloka egin eta ondoren kantuan aritzeko. Iniziatibaren atzean Xabier Vesga txistularia dago. Berari otu zitzaion txistua eta danbolinarekin bizilagunen konfinamendua arintzea zuela, eta hala aipatu zien bizilagunak izateaz gain lagunak dituen hiru auzotarrei: Jose Usabiaga perkusionista, eta Vesgarekin batera korrika egiteko taldean dabiltzan Antton Aizkorreta eta Mikel Cia.
Primeran iruditu zitzaien eta aurrera egin zuten. Telefonoak martxan, Santa Klara whatsapp taldea sortu zuten, “gaur egun 70 bizilagun gaude talde horretan”. Herri bizia dela Errenteria dio Vesgak, “eta auzoak ere hala nahi ditugu, biziak, are gehiago une hauetan. Uste dut garrantzitsua dela halako iniziatibak martxan jartzea, auzokoekin harremanak indartu eta kasu batzuetan sortzeko, aurretik ez genuelako harremanik, edota elkar ezagutu ere ez genuelako egiten. Garrantzitsua da, musikaren bidez une goxo bat pasatzeko konfinamendu honen barruan egunero”.
Egunero dute hitzordua; hustik egin gabe. Hilaren 19an, joan den ostegunean jarri zuten martxan taldea, eta lehenengoz atera ziren balkoi eta leihoetara txistuak, perkusioak eta tarteka biolinak ere lagunduta abestera. “Lau Haizetara Euskaltzaleen Topaguneak udalarekin elkarlanean argitara atera duen kantu liburuxka taldean zabaldu eta bertako kantuak aukeratzen ditugu egunero. 20:00etan balkoi eta leihoetara ateratzen gara osasungintzan ari diren langileei aitortza txaloka egitera eta ondoren hasten dugu gure balkoi eta leiho arteko topaketa musikala”. Garrantzitsua keinua, kantu guzti guztiak euskaraz: Anttoni eta Antton, Bagare, Boga Boga, Agur Xiberua, Ixil Ixilik dago, madalenetako Diana, Loretxoa, Nere aitak amari, Txuri urdin —realzale amorratua dela aitortu du Vesgak— Eperrak, Furra furra, eta Maritxu nora zoaz jo eta abestu dituzte gaur arte.
Gaur beste bi kantu entzungo dira txistu eta perkusioak lagunduta Santa Klaran, baina ordubete lehenago jakinarazten omen dituzte egunekoak, “auzotarren artean aukeratzen ditugu”.
Abeslari onak diren Santa Klara alde horretan galdetuta, baietz dio Vesgak, “kantuaren arabera aldatzen da egoera, batzuk zailagoak direlako, baina oso ondo moldatzen gara”. Santa Klaran martxan jarritako iniziatiba beste auzoetara zabaltzeko deia egin du Vesgak, “egoera ezberdinei beren alde positiboa bilatu behar diogu, auzoko harremana sendotu; herri bizia gara, eta auzoak ere biziak ditugu, une hauetan gehiago bizitu eta indartu behar ditugu. Bakoitzak nahi duena edo dakiena eginez garrantzitsua da auzotarren arteko sarea aktibatzea, harremana sustatzea, gutxienez konfinamendua goxatzeko bada ere”.
Iniziatibak gainera, beste gauza batzuetarako baliagarriak izan daitezkeen zalantzarik ez du txistulariak, “indarguneak finkatzeko eta elkarren arteko bestelako harremanak sortzeko, auzoa eta auzoko giroa indartzeko, beste modukoa egiteko”.
Oraindik taldean ez dagoen baina sartu nahi duen Santa Klarako bizilagunei, balkoi edo leihotik beste auzotarrei galdetzeko esan du Vesgak, “taldean sartzeko aukera dute horrela”.
Gaur 20:00etan hutsik egin gabe txalotuko dituzte osasungintzako profesionalak Santa Klara kalean ere, eta ondoren, duten onena jarriko dute kantuan.
