Oarsoaldea Garapen Agentziak diru laguntza eskaerak bideratuko ditu
Osasun krisia krisi ekonomikoaren eskutik doa, eta Oarsoaldea Garapen Agentziak esan du galerak izaten ari diren enpresen bidelagun izango dela.
Covid-19 birusak sortutako osasun krisiak ondorio ekonomikoa ditu. Horregatik, Oarsoaldea Garapen Agentziak jakinarazi du dirulaguntzak atera bezain pronto, eskualdeko pertsona eta enpresei jakinaraziko diela.
“Konfiantza dugu pertsonengan eta haien sendotasunean, eta ziur gaude, gizarte osoarekin lankidetzan, egoera honi aurre egitea lortuko dugula”, esan dute garapen agentziako arduradunek.
Ildo horretan, gaineratu dute beren prestutasun osoa izango dutela dirulaguntzei buruzko informazioa, orientazio aktiboa eta dirulaguntza horiek eskatzeko laguntza eskaintzeko.
Gainera, jakinarazi dute leihatila bakarra egongo dela. Bakoitzak bizi duena kontatzeko e-posta helbidea martxan jarri dute, eta haiek erakunde publikoei bideratuko diete. Mezuak erantzungo dituztela azaldu dute, baliabideak herritarren eskuetan jartzeko.
“Orain, inoiz baino gehiago, elkartu eta elkarlanean aritu behar gara krisi honi aurre egiteko”, bukatu dute.
