Udalak ere eskola kirola etxean egitera animatu ditu Lezoko gazteak
Koronabirus garaiko konfinamenduan ohitura osasungarriak sustatzeko asmoz, Eskola Kirola Etxean egitasmoaren alde agertu da Lezoko Udala.
Lezoko Udalak Eskola Kirola Etxean egitasmoarekin bat egitera deitu ditu herriko gazteak. Koronabirusak eragindako larrialdiaren ondorioz, haur eta gazte guztiak asteak eman beharko dituzte etxean konfinatuta. Haiek sumatuko dituzte bereziki hiritarren mugikortasun askatasunari ezarritako murrizketak. Itxialdia arintzeko helburuz eta ohitura osasungarriak alde batera ez uzteko, Lezoko Udalak Eskola Kirola Etxean egitasmoarekin bat egitera deitu ditu herriko gazteak.
Oarsoaldeko Eskola Kirola teknikariak eta Kirolaisi XXI enpresak haien jarduna birpentsatzen aritu dira, eskualdeko gazteei eta haien familiei kirola egiteko aukerak eskaintzeko, bideoen bitartez. Bideo horietan, teknikariek jarduera fisikoan oinarritutako jolasak eta erronkak proposatzen dituzte, haurrek eta haien familiek etxean egin ditzaten.
Egunero bideo berri bat igoko da. Ikastetxe bakoitzeko Eskola Kirolako koordinatzaileak bidaliko dizkie bideoak familiei. Hala ere, eduki guztia ikusgai izango dira Kirolaisi XXI enpresaren Facebook eta Youtube kontuetan.
Berrogeialdia, geldialdi ez bihurtzeko urratsak ematen ari dira Lezon. Esate baterako, aurreko astean Lezoko kiroldegiko arduradunek etxean jarduera fisikoa egiteko plataforma irekia martxan jarri zuten.
