Petra Lekuona zaharren etxeko langileen aldeko txalo zaparradara deitu dute
Igande eguerdirako deitu dute txalo zaparrada. Borrokan ari ziren langileek mobilizazioak alde batera utzi dituzte bizitzak zaintzeko.
Petra Lekuonako langileak, azaroko plenoan, bere aldarrikapenen berri ematen. Egoera honetan lanera bueltatu dira.
Zaharren etxeetako langileek greba luzea egiten ari ziren, beren lan egoera baldintza kaskarrak hobetzearen alde. Orain, salbuespen egoerarekin batera, mobilizazio hori alde batera utzi, eta “bizitzaren aldeko borrokan” hasi dira.
Lanera itzuli dira. Oraingoz. Izan ere, egoera normaltasunera bueltatzen denean, mobilizazioetara bueltatuko direla iragarri dute, ezer aldatu ezean.
Oiartzuar talde batek deituta, erresidentzietako lana aitortzera deitu dute iganderako. 12:00etan jarri dute zita: herritarrak balkoi edo leihoetara ateratzeko eskatu dute, Petra Lekuona zaharren etxeko langileei txalo zaparrada bat eskaintzeko. “Eskertzekoa da egiten ari diren lanan eta ahalegin guztia”, adierazi dute antolatzaileek.
Txaloei zein bestelako soinuei Done Eztebe parrokiako kanpaiak batuko zaizkiela iragarri dute.
