Biblioteka etxe barruraino sartuko da
Klik bakarrarekin, adin guztiei begirako datozen asteetarako bibliotekak antolatu dituen ekintza gustukoenak aukeratzea izango dute herritarrek.
Online eskaintza egingo du liburutegiak osasun larrialdi garaian. Ateak itxita daude bibliotekak osasun krisi larrialdiaren harira ezarritako alarma egoeragatik joan den hilaren 13az geroztik. Ateak itxita, baina leihoak zabalik eta etxe barruraino sartzeko prest, hala erabakitzen duten herritarren kasuan behintzat, azken horien literatur gosea asetzeko.
Klik bakarrarekin, adin guztiei begirako datozen asteetarako bibliotekak antolatu dituen ekintza gustukoenak aukeratzea izango dute herritarrek. Aste honetarako, eta asteazkenerako zehazki, hiru ekintza antolatu ditu: Txikienentzat (3-5) urte Irakurketa Kluba Lur Kortak gidatua; English Book Club, Slawka Gravowskaren gidaritzapean; eta Elikadura Osasungarria hitzaldia, Jone Mendaroren eskutik.
Parte hartzeko, bibliotekak esteka bat jarriko du bere sare sozialetan, facebooken eta twitterren. Google Chrome erabili behar da eta ordenagailuko kamara eta mikrofonoa baimenduak daudela ziurtatu. Ekintzetan parte hartzen dutenei normalean, liburutegiak zuzeneko gonbita egingo die, baina ekintza guztiak irekiak izango dira, txikienei begirako Irakurketa Kluba izan ezik; azken horretarako aldez aurretik eman beharko da izena.
Ekintzen ordutegia
- Irakurketa kluba (3-5 urte): Apirilak 1, asteazkena, 17:15etatik 18:15etara (Lehentasuna izango dute aurretik klubean izena emanda daudenak).
- English Book Club: Apirilak 1, asteazkena, 19:00etan.
- Elikadura osasungarria: Apirilak 1, asteazkena, 10:30ean.
