Maskarak egiteko irabazi asmorik gabeko taldea sortu dute Oarsoaldean
Lezon jaiotako 'Maskarilla Solidarioak Oarsoaldea' egitasmoak boluntarioak bilduko ditu maskarak egiteko eta gehien behar dituztenei doan banatzeko. Prozesua zatika banatuko dute, norberaren aukeren arabera.
Osasun arloko profesionalen eskariari jarraiki, maskara kirurgikoak lehenetsiko dituzte. Irudia: 'Maskarilla Solidarioak Oarsoaldea'. Maskarak egiteko eta gehien behar dituzten kolektiboei doan banatzeko, ‘Maskarilla Solidarioak Oarsoaldea’ talde boluntarioa sortzen ari dira. Horixe da jostea zaletasun duten Lezoko pertsona talde baten ekarpena larrialdi sanitarioari aurre egiteko. Nahi duenak haiekin bat egin dezake. Elkartasun herrikoitik jaiotako irabazi asmorik gabeko egitasmoa da eta datozen egunetan prozesu guztia lotzen eta zehazten jardungo dute.
Maskarak benetan behar dituzten sektoreengana iritsi nahi dute, bereziki “sistemaren zutabe diren emakume ikusezinengana”.
Taldearen sortzaileek egin beharreko maskarei buruzko hainbat zehaztapen eman dituzte. Maskara kirurgikoak dira egin beharrekoak. Osasun arloko profesionalek eskatutakoaren arabera, mota jakin bateko maskarak egitea lehenetsi dute. %100ean kotoizkoak izan beharko dute eta iragazki gisa funtzionatuko duen oihal plastifikatu bat eduki beharko dute, izerdia pasatzen uzteko gai izango dena. Plastikozko oihalik ez duten jostunek, irekidura bat utzi beharko dute, maskararen erabiltzaileak filtroa jar dezan.
Iragazkiak egunero bota beharko dira eta ura eta xaboiarekin garbitu, 65 gradutik gora. Irizpide horiek betez gero, maskarek kutsatzeak erdira murritz ditzaketela diote profesionalek. Beste hainbat irizpide eman dizkiete osasun arloko langileek boluntario eta erabiltzaileei; maskarak ez ukitzea erabiltzen diren bitartean eta ukitzekotan, eskuak berehala garbitzea ur eta xaboiarekin. Ahal izatekotan, betaurrekoak ere jartzea gomendatu dute.
Oarsoaldean garatzen ari den egitasmoa izan arren, saretzeko helburuarekin jaio da. Gasteizen lan berdina egiten ari den talde baten aholkuei jarraiki, dagoeneko harremanetan jarri dira inguruko hainbat eragile publiko eta pribaturekin, baita gizabanakoekin ere.
‘Maskarilla Solidarioak Oarsoaldea’-k lan prozesua arloka banatu du, boluntarioek haien gaitasunaren arabera bat aukera dezaten. Arloak, eskaera, dohaintzak, jostea, jasotzea eta banatzea izango dira. Gaur-gaurkoz, logistika eta banaketan dituzte arazo gehien, ezarrita dauden mugikortasun murrizketak direla eta.
